කරන්දෙණිය එම්. සුසිල් ප්‍රියන්ත
ලෙඩ ඇඳේ ඉන්න මව වසරකටත් ආසන්න කාලයක් තිස්සේ බලන්න නොගිය මහජන නියෝජිතයකු තමා දරු පවුල සමග ගිය වන්දනා ගමනක ඡායාරූප මුහුණු පොතට එක් කර තිබියදී ඒ සම්බන්ධයෙන් ඔහුගේ සොහොයුරකු මුහුණු පොතට දැමූ දැන්වීමකින් මහජන නියෝජිතයාට මහ පාරේ යන්න බැරිවුණු අපූරු පුවතක් දකුණු පළාතෙන් අසන්නට ලැබේ.
ඔහු දකුණු පළාතේ හිටපු පළත් සභා මන්ත්‍රීවරයෙකි. දරු පවුල්කාරයෙක් ද වන්නේය. මාසයකට වරක් වත් අඹුදරුවන් සමග වන්දනා මාන කිරීමට රටේම සිද්ධස්ථාන කරා ගමන් ගියේය. ඒ යන සෑම විටකම සිය අඹුවගේ මවද එක්කර ගෙන ගියේය.
ඔහු මෙලොවට බිහිකළ මෑණියන් ලෙඩ ඇඳට වැටුණේ දැනට වසරකට පමණ උඩදීය. ඒ ඔහුගේ සොහොයුරකු ළගය. එදා මෙදා තුර කාලයේදී ඔහු වැදූ මව බැලීමට නොගියේය. මවගේ පණවූයේ ඔහුය. මව ඔහුගේ නම කිය කියා ලෙඩ ඇදේ සිට දවසකට දෙතුන් සැරයක්වත් කෑමොර දුන්නේ ඒ නිසාම විය.

ඔහු සිය අඹුදරුවන් සමග වන්දනා ගමන් යන්නේ මේ අතරවාරයේදීය. එසේ වන්දනා ගමන් යන ඔහු එහි ඡායාරූප මුහුණු පොතට එක් කිරීමට ද අමතක ද නොකළේය. මේ ළගදී ගිය වන්දනා ගමනක ඡායාරූප මුහුණු පොතට එක්කළේ මේ ඊයේ පෙරේදාය.
ඒ සමගම ලෙඩ ඇඳේ සිටින අම්මා බලාගන්නා සොහොයුරා ඊට අපූරු දැන්වීමක් දැම්මේය. ඒ “ඔය යන වන්දනා ගමන් අතරතුර අම්මා බලන්නත් වන්දනා ගමනක් දාගත්තොත් ලැබෙන පින අනන්තයි...දැනට වසරකට ආසන්න කාලයක් වනවා නුඹ අම්මා බලන්න නෑවිත්”යැයි කියමිනි.
 ඒ දැන්වීමත් සමග දැන් ඔහුට පාරේ බැහැලා යන්න බැරි තත්ත්වයක් නිර්මාණය වෙලාලු‍.