(බුලත්කොහුපිටිය රවීන්ද්‍ර වෙලගෙදර)

ජංගම දුරකථන යැයි සිතා කාර්යාලයේ තිබූ සීල් ගසන තීන්ත පෑඩය හදිසියේ තම අත්බෑගයේ දමා ගෙන ගිය කතක ගැන බුලත්කොහුපිටිය ප්‍රදේශයේ එක්තරා රජයේ කාර්යාලයකින් වාර්තා විය.

සිද්ධිය සැකවින් මෙසේය. ඇය එම කාර්යාලයේ ප්‍රධාන තනතුර හොබවනු ලබයි. සිදුවීම වූ දින ඇය දහවල් ආහාරය සඳහා කාර්යාලය වසා තම නිවෙසට යාමට සූදානම් විය.

එහෙත් එදින ටිකක් වැඩ අධික දිනයක් වූ බැවින් වෙනදාට වඩා කාර්යාලය වසන වේලාව ගතවී තිබුණි. ඇය කඩිමුඩියේ කාර්යාලය වසා තම අඩුම කුඩුම ටික බෑගයට දමා පිටත්වූයේ නැවතත් නියමිත වේලාවට කාර්යාලය විවෘත කළ යුතු බැවිනි. ඇය තම නිවෙසට යන අතර මගදී තම පාලන කාර්යාලයට පණිවිඩයකට දුරකථන ඇමතුමක් ගැනීමට සිදුවිය.

ඇය තමන්ගේ බෑගය විවෘත කර ජංගම දුරකථනය ගැනීමට සූදානම් වුවද ජංගම දුරකථනය ඇගේ බෑගයේ නොවීය. කාර්යාලයේ සීල් ගසන තීන්ත පෑඩය බෑගයේ කොනකට වන්නට තිබුණි. සිදුව තිබෙන දේ තේරුම් ගැනීමට ඇයට වැඩි කාලයක් ගත නොවුණි.