(කරන්දෙණියේ - සුසිල් ප‍්‍රියන්ත)
යාබද නිවසේ විසූ කාන්තාවගේ රෙදි වැලේ වනා තිබූ රෙදි අතරින් ඇයගේ යට කලිසම සහ යට සාය හොර රහසින් පන්නා එහි ”අයි ලව්” යන වැකිය සමග ජංගම දුරකථනයේ අංකය සහ සිය නමද ලියා යළිත් ඒ රෙදි වැලටම දැමුවේ යයි කියන පුද්ගලයකු සැකපිට ප‍්‍රශ්න කිරීම සඳහා අත්අඩංගුවට ගත් බව පොලිසිය කියයි.


පොලිසිය පවසන පරිදි දෙදෙනාම විවාහකයෝය. යාබද නිවෙස්වල විසු අයවූහ. නිවෙස් දෙක වෙන්ව තිබුණේ වැටකිනි.
කතානායකයා මේ කාන්තාව සමග නිතර නිතර හාදවීමට උත්සාහ කළේය. ඒ කිසිවකින් ඇය මෙල්ල කිරීමට නොහැකිවී ඇත. ඔහුත් මේ ගේම ලෙහෙසියෙන් අත් නොහැරියේය.


ඒ සඳහා එක එක ක‍්‍රමෝපායන් භාවිතා කළේය. ඒ අතර සාම්ප‍්‍රදායේ තියෙන ඒවා මෙන්ම සාම්ප‍්‍රදායෙන් බැහැර ඒවාද විය. ඒ එකක්වත් වැඩ නොකළේය. අන්තිමට ඔහු මෙතුවක් කලක් කවුරුත් කළා යැයි අහන්න දකින්න නොලැබුණු දෙයක් මේ වෙනුවෙන් කරන්න සිතුවේය. ඒ ඔහු ඇයට ඇති අසීමාන්තික ආදරය පෙන්නීමටය.


යාබද නිවසේ විසූ ඇයගේ තමාට අවැසි රෙදි වැලේ දමන තෙක් ඔහු දින ගණනක්ම බලා සිටියේය. එදින උදාවිය. ඔහු කාටත් හොරෙන්ම රෙදි වැල ළඟට ගොස් ඇයගේ යට කලිසම සහ යට සාය රැුගෙන ආවේය. ඒවායේ ”අයි ලව් යූ” වැකි සමග තමන්ගේ ජංගම දුරකථන අංකය සහ සිය නමද ලිව්වේය. ඉන් අනතුරුව ඔහු එම යට කලිසම සහ යට සාය යළිත් එම රෙදි වැලට දැමුවේ මෙවර නම් ඇය තමාට කැමැති වේ යයි සිතාය.


සිදුවූයේ අනෙකකි. ඇය ඔහුට ආදරය කිරීම වෙනුවට කළේ අයි ලව් යූ කියා, ජංගම දුරකථන අංකය සහ නම ලියා තිබූ යට කලිසම සහ යට සාය පොලිසියට රැුගෙන යාමය. යට කලිසමේ සහ යට සායේ ලියා තිබූ ජංගම දුරකථන අංකයට ඇමතුමක් දුන් පොලිසිය එය කතානායකයාගේ බව පසක් කර ගත්තේය. ඒ අනුව ඔහු පොලිසියට කැඳවා තදින්ම අවවාද කොට කතානායිකාවගේ පැත්තවත් නොබලන ලෙසද නියෝග කොට පොලිස් ඇපමත මුදා හැරියේය.
පොලිසිය පරීක්ෂණ පවත්වයි.