උත්සවයක මුදාහැරීම සඳහා විකිණූ සුදු පරෙවියන් නිරුපද්‍රිතව පසුදින පුරුදු කූඩුවටම පැමිණීමේ සිද්ධියක් කොළඹට ආසන්න ප‍්‍රදේශයකින් අසන්නට ලැබුණි.
විනෝදාංශයක් ලෙස පරෙවියන් ඇතිකරන අයකුගෙන් පුද්ගලයෙක් පරෙවියන් මිලට ගෙන ඇත්තේ උත්සවයකට පැමිණෙන ආරාධිතයෙකු අතින් මුදාහැරීම සඳහාය.
සැලසුම් කරගත් පරිදි පැවැති උත්සවයේ ආරාධිතයා පැමිණ සිටි අයගේ අත්පොළසන් හඬ මැද රටට සාමය ප‍්‍රාර්ථනා කරමින් පරෙවියන් අහසට මුදා හැර තිබේ.
මෙහිදී මිටෙන් මුදා හළ පරෙවියන් නිදහසේ ඉහළ අහසට ඉගිල ගොස් පසුව නොපෙනී ගොස් ඇත.
කලින් දිනයේ විකිණූ පරෙවියන් උදේ කූඩුව අසල ගසක වසා සිටිනු දැක උන් කූඩුව තූළට ගත් විකිිණූ අය ”ආ උඹලා මම ළඟටම නැවතත් එන බව මම දැනගෙන සිටියා” කියා නිහඬ වුණා ලූ.