උත්සව භූමියක රාජකාරියේ යෙදී සිටි පොලිස් පිරිසකට දිවා ආහාරයට ඇරියුම් කොට ඔවුන් එහි ගිය පසු කෑම සූදානම් කර තිබූ කාමරය වසා දමා ආයතන ප‍්‍රධානීන් මගහැර යෑමේ සිද්ධියක් සියනෑවේ කෙළවරක ගම්මානයකින් වාර්තාවේ.
නවීන ආකාරයේ නිෂ්පාදන ආයතනයක් පසුගියදා දෙස් විදෙස් නියෝජිතයන්ගේ සහභාගිත්වයෙන් විවෘත කෙරිණි. මෙහි අවට ආරක්ෂාව සැලසීම සඳහා පොලිස් පිරිසක් යෙදවූයේ විශේෂිත ආරාධිත ප‍්‍රභූන් රැසක්ම මෙයට සහභාගි වන බව දන්වා තිබූ බැවිනි.
උත්සවය අවසාන වූයේ දිවා ආහාරයද සමගිනි. සියලූ ආරාධිතයෝ පිටත්ව ගියහ. ආයතනයේ නිලධාරියෙක් පොලිස් පිරිස සොයා ආවේය. සියලූ දෙනාට දිවා ආහාරයට ඇරියුම් කෙරිණි. මහ වැස්සේ තෙමෙමින් රාජකාරියේ යෙදී සිටි පොලිස් පිරිසට මේ ආරාධනාව මහත් අස්වැසිල්ලක් විය.
ඔවුහු එහි ගියේ කුසගින්නෙන් පෙළෙමින් සිටි නිසාමය. ඔවුන් සමග ඔවුන්ට ආරාධනා කල අයද වූයේය. මේ පිරිස ආහාරය සූදානම් කර තිබූ ස්ථානයට යද්දී එහි සිටි සේවක පිරිස කාමරය වසා දමා යන්නට ගියේ මොකට මෙහෙ ආවාදැයි පොලිස් පිරිසගෙන් ප‍්‍රශ්න කරමිනි. පොලිසියට ආරාධනා කළ අයද අසීරුවට පත් වෙද්දී පොලිස් පිරිස ආපසු හැරුණේය. පසුදා උදේ තිහ හතළිහකට තරම් කෑම තොගයක් වළ දැමීමට මේ පාලකයන් කටයුතු කළ බවද දැනගන්නට ලැබිණි.