කූඩුවකින් පැන්න මයිනෙකු ගෙදර දොරකඩ තිබූ බඳුනක  කෑම කන්න පුරුදුවී නිවැසියන්ගේ සුරතලකු වූ පසු කූඩුවකට දැමූ විට ඌ අසභ්‍ය වචන කීම නිසා නැවත කැලයකට මුදාහැරීමේ සිද්ධියක් අගනුවරට ආසන්න ප්‍රදේශයකින් අසන්නට ලැබුණි.

මේ නිවසේ දිනපතා සතුන්ට කෑම සඳහා බඳුනකට ආහාර දැමීම කර ඇත. ගිරවුන්, මයිනන්, ලේනුන් වැනි සතුන් පැමිණ එම ආහාර කෑමට පුරුදුව තිබේ.

 ඒ අතරේ දිනක් තරමක් හොඳින් වැඩුණු මයිනෙකු පැමිණ ඇත. ඒ මයිනා අනෙක් සතුන් මෙන් ළඟට පැමිණිවිට ඉගිල නොයන නිසා ගෙහිමියා විමසිල්ලෙන් සිට තිබේ. කෑම අතේ තිබුණත් පැමිණ කන නිසා කවුරු හෝ හුරතලයට ඇතිකළ මයිනෙක් වෙන්න ඕනෑ යැයි සිතු ගෙහිමියා කුඩුවක් ගෙනවිත් ඌ අල්ලා කුඩුවකට දමා තිබේ.

  දිනක් දෙකක් කුඩුවේ සිටි මයිනා හිටි ගමන් අසභ්‍ය වචනයක් කියන අයුරු ඇසී තිබේ. මෙය ඇසූ නිවැසියන් පුදුමයට පත්ව කොතනක හෝ නරක මිනිසුන් ඉන්න තැනක මේ සතා හැදිලා තිබෙනවා. සතෙක් උනත් නරක සමාජයක හැදුනොත් ප්‍රතිඵලය ඕක තමා. මේ වගේ සත්තු තියා ගත්තොත් අපේ ළමයින් නරක් වෙනවා. පුරුද්ද අතාරින්නෙත් නෑ. ඒ හින්දා ඔන්න ඔය මයිනා කැලේට ගිහින් දාන්න යැයි ගෙහිමියාගේ බිරිඳ කියන්නට වීම නිසා අවසානයේ මයිනා කැලේට ගිහින් දැමූ බව පැවසේ. 
(වැල්ලම්පිටිය ශාන්ත සෙනවිරත්න)