අනධ්‍යයන සේවකයකුගේ විවාහ මංගල උත්සවයට ගොස්  උසස් පෙළ පන්තියේ ළමයින් සමග නර්තනයක යෙදෙන විට ඇද වැටී කකුල තුවාල කරගත් නියෝජ්‍ය ආයතන ප්‍රධානී නිලධාරිනියක පිළිබඳ පුවතක් දුෂ්කර ප්‍රදේශයකින් වාර්තාවේ.

ශ්‍රී ලංකාවේ රමණීය ප්‍රදේශයක පිහිටි පාසලක සේවය කරන  අනධ්‍යයන සේවකයකු සිය විවාහ මංගල උත්සවයට පාසලේ ප්‍රධානීන්ට සහ අධ්‍යයන අනධ්‍යයන සියලුම දෙනාට ආරාධනා කළේය.

තරුණ වයසේ පසුවන සේවකයා පාසලේ උසස් පෙළ පන්තියේ සියලුම දෙනාගේ කලන මිතුරකු වූ නිසා ඔවුන් කිහිප දෙනෙකුට ද මගුල් ගෙදරට ආරාධනා කළේය. මගුල් උත්සවය සිය නිවසේම යොදාගත්තේ සියලුම පහසුකම් එහි ඇති බැවිනි. මනාළ යුවළ දහවල් වෙද්දී නිවසට පැමිණි අතර ආරාධිත අමුත්තන්ගෙන් නිවස පිරී ඉතිරී යන්නට විය.

නිවස පිටුපස කොටස මධ්‍යසාර පානය සඳහා වෙන්කර තිබූ අතර ටික වේලාවක් ගතවන විට ඩී.ජේ. සංගීත නාදයට අනුව නර්තනයද ආරම්භ විය. පදම වැඩි වූ බොහෝ පිරිසක් නටමින් සිටි අතර ඔවුන් සමග තරුණියෝ සහ කාන්තාවෝද වූහ.

සංගීත නාදය වේගවත් වූ අතර ළමයිද නටන පිරිස සමග එක්වූහ. තරුණ බව පෙන්වීමට නිතරම උත්සාහ දරණ මෙම නිලධාරිනියද නටන පිරිස අතරට පැමිණ නටන්නට වූ අතර සෙසු නිලධාරීහු වටපිට බලමින් එම ස්ථානයෙන් ඉවත්වූහ.

පාසලේ ළමයින්ගේ අත් අල්ලා ගනිමින් නටමින් සිටි ඇය හිටි හැටියේම පය පැටලී ඇද වැටුනාය. නටමින් සිටි පිරිස ඇය පුටුවක වාඩිකර නැවත නටන්නට පටන් ගත්හ. සිය කාර්ය මණ්ඩලය පිළිබඳව ඇය විපරම් කරන විට සියල්ලෝම පිටව ගොස් තිබුණි. මනමාලයා විසින් සපයා දෙන ලද ත්‍රිරෝද රථයේ නැගී ඇය නිවසට ගියාය.

සිද්ධිය පිළිබඳ කතාව ප්‍රදේශය පුරා පැතිර යාමට වැඩි කාලයක් ගත නොවූ අතර එම සිදුවීම සම්බන්ධයෙන් සහෝදර සේවකයින්ගෙන් ඇයට එල්ල වූයේ දැඩි දෝෂ දර්ශනයකි.

විභාගයක් ඇති බව කියා ඇය දින කිහිපයක් නිවාඩු ලබාගෙන ප්‍රතිකාර ගත්තද කකුලේ අමාරුව හේතුවෙන් වෙනත් ප්‍රදේශයකට ස්ථාන මාරුවීමක් ලබා ගෙන ගියද එම ප්‍රදේශයටද කතාව ආරංචි වීමට වැඩි කාලයක් ගත නොවීය.