කළුකුමාර දෝෂය දුරු කර ගැනීමට දේවාලයක පිහිට පතා ගෙන ගිය තරුණියට (17) අතවර කිරීමට තැත් කළැයි කී කපුවකු (51) ඊයේ (27) අත්අඩංගුවට ගත් බව කහතුඩුව පොලිසිය කියයි.


නිරතුරුවම සෑදෙන උදරයේ වේදනාව, හිීනෙන් බයවීම නිසා ඥාතියකු මාර්ගයෙන් දුර බැහැර ප‍්‍රදේශයක දේවාලයකට ගිය තරුණිය එම දේවාල කපුවා ආරූඪයෙන් පැවසූ ප‍්‍රතිකර්මය කිරීම සඳහා පොල්ගස් ඕවිට ප‍්‍රදේශයේ දේවාලයකට ගිය දෙවන දිනයේ දී මෙම අතවරය වී ඇතැයි පොලිසිය කියයි.


සැකකාර කපුවා තරුණියට පළමු දවසේ තෙල් වර්ගයක් ඇඟ ගිල්වීමෙන් අනතුරුව රතු පාටට හුරු පැදුරක්, රතු රෙද්දක්, පාට හතකින් යුත් චීත්ත රෙද්දක්, පාට හතකින් යුත් මල්, එක නැට්ටේ දෙහි ඇතුළු විවිධ දෑ ඇතුළත් ලැයිස්තුවක් ලබාදී කෙම්මුර දිනයක නා පිරිසුදු වී පැමිණෙන ලෙස දන්වා ඇතැයි තරුණිය කළ පැමිණිල්ලේ සඳහන් වේ.


කපුවාගේ උපදෙස් පරිදි ඔහු ලවා භාණ්ඩ ලැයිස්තුවේ සියලූම භාණ්ඩ රැගෙන සහෝදරයාත් සමග දේවාලයට ගිය තරුණිය පමණක් දේවාලය තුළ තිරය පිටුපසට ගෙන යට ඇඳුම් ගලවා දමා කෙම කිරීමට සූදානම් වන ලෙසත් රතු රෙද්ද ඇෙඟහි දවටා ගෙන ගෙන එන ලද පැදුර එලා චීත්ත රෙද්ද දමා සැතපෙන ලෙස පවසා සැකකාර කපුවා තිරය පිටුපස හිඳ ස්ත්‍රෝත කියමින් හලං නාද කර ඇතැයි පොලිසිය කියයි.


අනතුරුව තරුණිය අසලට ගොස් ඇති කපුවා දෙහි ගෙඩි ගෙන හිසට උදරයට හා පාදයට තබා දෙහි කපා ඇත.
පසුව සැකකාර කපුවා තෙල් වර්ගයක්  තරුණියගේ ඇෙඟ් පැය භාගයකට ආසන්න කාලයක් ගා පිරිමැද ඇතැයි පොලිසිය කියයි. ටික වේලාවකට පසුව සැකකාර කපුවා තරුණියගෙන් ශරීරයට යම් වෙනසක් දැනෙනවාදැයි ප‍්‍රශ්න කර ඇති අතර අනතුරුව තෙල් ගල්වා ඇතැයි ද පැමිණිල්ලේ සඳහන් වේ.


දේවාලය තුළ දී වූ සිද්ධිය නිවැසියන්ට පවසා ඇති තරුණිය ඔහුන්ගේ උපදෙස් මත මෙම පැමිණිල්ල කර ඇතැයි පොලිසිය කියයි.
සැකකාර කපුවා ඊයේ කැස්බෑව අධිකරණයට ඉදිරිපත් කිරීමට නියමිතව තිබිණි. කහතුඩුව පොලිසියේ ස්ථානාධිපති පොලිස් පරීක්‍ෂක ප‍්‍රසන්න කුමාර මහතාගේ උපදෙස් මත අපරාධ අංශයේ ස්ථානාධිපති උප පොලිස් පරීක්‍ෂක පුෂ්පකුමාර දන්තනාරායන මහතා පරීක්‍ෂණ පවත්වයි.