තම ගෙවත්තේ වළ දා ඇතැයි කියන කොඩිවිනයක් නොමිලේම ගොඩදා ගැනීමට සිතූ ගෙහිමියෙක් මිදුලේ අලංකරණයට තිබු මල් පඳුරු සියල්ල ගලවමින් පොළව හාරා කොඩිවිනය සෙවීමේ පුවතක් දකුණු පළාතේ ගම්මානයකින් අසන්නට ලැබිණි.

මැදිවියේ ගෙහිමියා සිය බිරිය සමග ප‍්‍රදේශයේ දේවාලයක් වෙත ගොස් සාත්තරයක් ඇසුවේය. එහිදී සාත්තරකරු ආරූඪයෙන් පැවසුවේ ඔවුන්ගේ ගෙවත්තේ මල් පඳුරක් යට පොළවේ කිසියම් අයකු කොඩිවිනයක් සහිත බෝතලයක් වළ දා ඇති බවයි.

නිවසේ අයට ඉතා අපලදායි මෙම කොඩිවිනය ඉතා ඉක්මනින් ඉවත් කළ යුතු බව කී සාත්තරකරු එය ඉවත්කර දීමට ඉලක්කම් පහේ මුදලක්ද අවශ්‍ය බව ගෙහිමියාට පැවසීය. මේ ගැන කථා කරගෙන දින වෙන්කර ගැනීමට පසුව එන බව පවසා ගෙහිමියා ආපසු ගෙදර පැමිණියේය.

සාත්තරකරු කී පරිදි කොඩිවිනය ගොඩගැනීමට මුදල් නොමැතිව සිටි ගෙහිමියාට අපූරු අදහසක් පහළ විය. ඒ අනුව ඔහු බිරිය නිවසෙහි බැහැරව ගිය දිනක කොඩිවිනය සොයා මිදුලේ තිබූ විවිධ වර්ගවල මල් පඳුරෙන් පඳුර ගලවමින් වළවල් හාරා කොඩිවින බෝතලය සොයන්නට විය.

එහෙත් හමු වූ කොඩිවිනයක් නොවීය. හවස නිවෙසට පැමිණි බිරියට ස්වාමිපුරුෂයා කර ඇති වින්නැහිය දැක යකා නැග්ගේය.
මොකද මනුස්සයෝ මේ මම මහන්සියෙන් හිටවපු මල් පඳුරු ටික ගලවලා තියෙන්නේ යැයි ඇය කෝපයෙන් විමසූ විට ගෙහිමියා ඇත්ත කීවේය.

තමුසෙ කරල තියෙන කොඩිවිනය හොඳටම ඇතියි කියා බිරිය ඔහුට තවත් දොස් නැගුවාය.

කිසිවක් නොකි ගෙහිමියා ගලවා තිබූ මල් පඳුරු සියල්ල යළි තිබූ පරිදිම සිටුවා දමා දින ගණනක් තිස්සේ තවමත් ඒවාට වතුර දමමින් සාත්තු කරන්නේ මල් පඳුරු මැරුණොත් බිරිඳගෙන් විසුමක් නැති නිසාලූ.