දුන්හිඳ දිය ඇල්ල අසල දී සැර බුලත්විටක් කන්නට දී කුණුහරුප කීපයක් ඉගැන්වීමට උත්සාහ කළ මෙරට උසස් අධ්‍යාපන ආයතනයක අධ්‍යාපනය ලබන තරුණ පිරිසකට පැහැදිලි සිංහලෙන් අවවාද අනුශාසනා කළ චීන ජාතික තරුණයින් දෙදෙනකු පිළිබඳ පුවතක් ලංකාදීපයට වාර්තා වේ.


සිද්ධිය මෙසේය


ඔවුහු මෙරට උසස් අධ්‍යාපන ආයතනයක අධ්‍යාපනය ලබන තරුණ පිරිසකි. පසුගිය සති අන්තයේ ඔවුහු දුංහිද දිය ඇල්ලට පැමිණියේ ඔවුන්ගේ භාෂාවෙන්ම කිවහොත් පොඩි ෆන් එකක් ගන්නටය.


දුන්හිඳ දිය ඇල්ලට අසලට පැමිණි ඔවුන්ට දැක ගන්නට ලැබුණේ දිය ඇල්ල ආසන්නයේ ගලක් මත හිඳිමින් ඡායාරූප ගන්නා කඩවසම් චීන ජාතික තරුණයින් දෙදෙනෙකි.


චීන ජාතිකයින් දෙදෙනාත් තරුණ පිරිසත් හුවමාරු කර ගත් සිනහව අවසානයේදී පුංචි මිතුදමක් බවට පත්වූයේ ඔවුන්ටත් නොදැනීමය.


මෙරට තරුණ පිරිස අතර සිටි එක් තරුණයෙක් තම මිතුරන්ට අපූරු යෝජනාවක් ගෙනාවේ මේ අතරේය.


“මචං අපි මුංට දුංකොළයි හුණුයි දාලා විටක් දෙමු”. “අපි මුංට කුණුහරුප ටිකකුත් කියලා දෙමු” තවකෙක් කීය.


තරුණයෙක් බුලත් දුංකොළ මෙන්ම වැඩිපුර හුණු එක් කළ විටක් චීන ජාතික තරුණයින් දෙදෙනා අත තබද්දී තවත් කීප දෙනකු නිතර භාවිත කරන කුණුහරුප කීපයක් චීන ජාතිකයින් දෙදෙනාට කියා දුන්නේ කණ්ඩායමේ සෙසු පිරිස ද සිනහ ගන්වමිනි.


මේ වචන කියලා තමා අපි සුභ පතන්නේ. තවත් තරුණයෙක් කැඩිච්ච ඉංග්‍රීසියෙන් චීනුන්ට වචන විස්තර කළේ ඒ තුළින් අපමණ වින්දනයක් ලබමිනි.
තරුණයින් සමග සිනහවෙමින් අපූරු වින්දනයක් ලබා ගත් එක් චීන ජාතිකයෙක් මොහොතක් ගතවෙද්දී පැහැදිලි සිංහලෙන් සිය හඬ අවදි කළේ තරුණ පිරිස පමණක් නොව ඒ අවට සිටි පිරිස ද පුදුමයට පත් කරමිනි.


“මල්ලිලා අපි මේ රටට ඇවිත් අවුරුදු දහයකට වැඩියි. අපි තමා අර අහවල් පාර කාපට් කළේ. මම ඉංජිනේරුවෙක්. මේ අපේ මැනේජර්. අපි මේ රටට ආව දවස්වලත් මුලින්ම මේ රටේ අය කියලා දුන්නෙ ඔය වගේ කුණුහරුප තමා. හැබැයි දැන් අපි හොඳට සිංහල දන්නවා. ඒ වගේම බුලත් විට ගැනත් දන්නවා.
ඔයාලා කියලා දුන්න වචන කියන්නේ ඔයාලගෙ ගම්වල අය රණ්ඩු වුණාමයි. ඒ වගේම බුලත් විටක් දෙන්නේ සුහද බව ඇති කර ගන්න මිසක් දුංකොළයි හුණුයි කන්න දීලා මත් කරවන්න නෙමෙයි. චීන ජාතිකයා දිගින් දිගටම කියාගෙන යද්දී තරුණ පිරිස එකිනෙකා දෙස බලමින් ලැජ්ජාවෙන් ඇඹරෙන්නට විය.


කෙසේ වෙතත් තරුණයන් පත් වූ අපහසුතාව දැනගත් චීන ජාතික දෙපළ ඒ අසල වූ වෙළෙඳ සලකින් මෙගා ප්‍රමාණයේ බීම බෝතල් දෙකක් ද මිලදී ගෙන තරුණ පිරිස අත තැබුවේ හැබැයි අපි සිංහල ඉගෙන ගත්තෙත් ඔයාලගෙම රටේ දුප්පත් කම්කරුවන්ගෙන්” යැයි ඔලොක්කුවට මෙන් පවසමිනි.

(වියලුව වාර්තාකරු)