හම්බන්තොට ඡුන්ද ගණන් කිරීමේ මධ්‍යස්ථානයේ දී කාන්තා වැසිකිළියකට නොදැනුවත්කමින් හදිසියට ගිය ඡුන්ද ගණන් කිරීමේ නිලධාරියකුට සිය අවශ්‍යතාව ඉටුකර දොර ඇරගෙන එළියට පැමිණි පසු කාන්තාවන් එහි සිටිනු දැක දෙලොව රත්වීය.

වටපිට බලා හෙමින් සීරුවේ එළියට පැමිණි ඔහු දොරේ ගසා ඇති කාන්තා වැසිකිළිය යන නාම පුවරුව දැක නිලධාරියා එතනින් මාරු වූයේ ලජ්ජා සහගත විලාසයෙනි.

කාන්තා වැසිකිළියේ දොර තරමක් අඩවල් වී තිබිණි. ඉහළ මාලයේ සිට වේගයෙන් පැමිණි ටයි පැළද ගත් මහත්තයෙක් එක්වරම කාන්තා වැසිකිළිය තුළට ගියේය. ටික වේලාවක් ගතවිය. මහත්තයා එළියට පැමිණියේ ද නැත. තවත් කාන්තාවන් තිදෙනෙක් සිය අවශ්‍යතාවයන් සඳහා වැසිකිළියට ගියෝය.

ප‍්‍රධාන දොරෙන් ඇතුළු වූ පසු වැසිකිළි කිහිපයක් මෙහි තිබේ. එක් වැසිකිළියක් වසා තිබෙන නිසා අනෙක් වැසිකිලිවලට කාන්තාවන් ගොස් එළියට පැමිණිය ද මහත්තයා තවමත් පැමිණියේ නැත. තවත් කාන්තාවන් කිහිප දෙනෙක්ම ප‍්‍රධාන දොරෙන් වැසිකිළියට ගිය අතර එක්වරම ඇතුළේ සිටි මහත්තයා දොර ඇර එළියට බසින විට දෙවියන් සිහිවුණි. දඩි බිඩි ගා ගෙන ප‍්‍රධාන දොරෙන් එළියට පැමිණි ඔහු නාම පුවරුව හිමින් සීරුවේ කියවා යළි උඩු මහළට ගියේ ආපස්ස නොබලාමය.

මේ සියල්ල හොඳින් මාධ්‍යවේදීන්ට නිරීක්ෂණය කර ගැනීමට හැකි වූයේ මැතිවරණ කටයුතු වාර්තා කිරීම සඳහා මාධ්‍යවේදීන්ට කාන්තා වැසිකිළිය ඉදිරිපිටම මාධ්‍ය කුටිය තනා තිබීමෙනි.