ඔහු ගොවිජනපදයක පදිංචි වෙළෙඳ ව්‍යාපාරිකයෙකි. ගොවීහු විශාල පිරිසක් ඔහුගේ කඩෙන් ගනුදෙනු කළෝය. සමහරු ණය තුරුස් ගෙව්වේ යල මහ වී අස්වනු නෙළු පසු හෝ මුං, කව්පි, බඩඉරිඟු, එලවළු, කෙසෙල් වැනිදේ විකිණීමෙන් පසුය. මුදලාලී ණයට දීමට මැලි නොවීමත් ගොවීන් ණය නොදී පොලූ නොතැබීමත් නිසා කඩ හිමියාද සාර්ථක වෙළෙඳ ව්‍යාපාරිකයෙක් විය. එක්තරා පුද්ගලයෙක් මේ කඩෙන් ගනුදෙනු කළේ දෙන්නන් කාසියටයි. මේ නිසා ණය පොතේ පිටුවක් ඔහුගේ නමින් වෙන්වී ඉලක්කම්වලින් පිරුණි. රුපියල් තුන්දාහක් පමණ ණය පොතේ ලියවුණි. පුද්ගලයා දෑන් කඬේ පැත්තේ එන්නේ කලාතුරකිනි. ඒත් මුදලාලි ණය ගැන මතක් කළේ නැත. වසරක් පමණ ගතවුණි ණය නොගෙවූ නිසා ඔහුට ණයට බඩු දීම නතර කළේය. එහෙත්  හිතවත් කමට හානියක් නොකළේය. මේ පුද්ගලයා පසුගියදා සිය පුතාගේ මංගල උත්සවයට ආරාධනා කළේය. මුදලාලී ඉතා සතුටින් බාර ගත්තේය. නියමිත දින ජැන්ඩියට සැරසී මුදලාලීද  හෝටලයේ පැවති මංගල සාදයට එක් වුයේ ඔහුගේ බිරියත් සමගිනි. හොඳහැටි  සප්පායම් වූ මුදලාලි ලියුම් කවරයක් තුළට ඇක්සයිස් පොතක පිටුවක් දෙකට තුනට නමා දමා අලවන අයුරු කීප දෙනෙක් දුටුවෝය. මොකද මුදලාලි ජෝඩුවට උපදෙස් ටිකකුත් තෑග්ගත් එක්ක තෑගි කළාද මුදලාලීගේ හිතවතෙක් කනට කර ඇසුවාලූ. මුදලාලි එවිට පිළිතුරු  දුන්නේ මෙසේලූ. මනාලයාගෙ තාත්තා මගේ කඬේට රුපියල් තුන්දහක් පොල්ලක් තියලා ඒ පොල්ල තමයි මම කවරේ ඇතුළට දැම්මේ. මුදලාලි ලියුම් කවරේ මනාලයාගේ පියාට දුන්නාලූ. සිද්ධිය දුටුවෝ ආපසු එද්දී නියම වැඬේ කියා බඩවල් අල්ලාගෙන සිනාසුනාලූ.