නිවසේ නාන කාමරයේ අලූතින් සවිකළ වැසිකිළි කට්ටලය දෙමසකට පසු ගලවා එය අයිතිකරුවන්ට ආපසු බාරදීමට රජරට නව නගරයක පුද්ගලයකුට සිදුවිය.
මෙම වැසිකිළි කට්ටලය පාවිච්චියට ගෙන තිබිණැයි ද පැවසේ.
සිද්ධිය මෙසේය.
නගරයේ ඉදිකැරෙන නව ගොඩනැගිල්ල සඳහා රුපියල් තුන් ලක්ෂයක් වටිනා උපකරණ එහි අයිතිකරු ගෙනැවිත් තිබුණේය. ඒවා ගොඩනැගිල්ලේ කාමරයක ගොඩ ගසා තැබීය. මේ අතර පිඟන් ගඩොලින් සැකැසූ ඒවා රැසක් විය.
පසුගිය දෙසැම්බර් මාසයේදී දිනෙක මෙම උපකරණ තොගය අතුරුදන්ව ඇති බව අයිතිකරුට දැනගන්නට ලැබිණි. ඔහු ඒ ගැන පොලිසියට පැමිණිල්ලක් කළේය.
මෙම සොරකම සම්බන්ධ පිරිසක් පසුගියදා පොලිස් අත්අඩංගුවට පත්වූහ. ඔවුන්ගෙන් කළ ප‍්‍රශ්න කිරීම්වලදී හෙළිවූයේ ඒවා විවිධ පුද්ගලයන්ට අඩු මිල ගණන්වලට විකුණා දමා ඇති බවයි.
පොලිසිය සැකකරුවන් සමග ඒ ඒ තැන්වලට ගොස් උපකරණ සියල්ල සොයා ගත්තේය. ඒ අතර වැසිකිළි කට්ටලය ද සොයා ගැනීමට හැකිවිය.
එය මිලට ගෙන තිබූ පුද්ගලයාගෙන් කළ ප‍්‍රශ්න කිරීමේදී අනාවරණය වූයේ තමන් මෙම වැසිකිළි කට්ටලය වෙළෙඳ පොළේ පවතින මිලට වඩා බොහෝ අඩු ගණනකට ගත් බවයි. එසේ වුවත් එය වැරැද්දකට කළ උදව්වක් විය හැකි නිසා වැසිකිළි කට්ටලය ආපසු ගලවාගෙන යන ලෙස දැන්වීය.