සාමාන්‍ය පෙළ දක්වා පාසල් අධ්‍යාපනය ලැබූ ඇය පවුලේ අගහිඟකම් නිසා ටික දිනකින්ම ගමේ අනෙක් තරුණියන් සමඟ ඇඟලූම් කම්හලේ ජුකී මැෂිමක් ඉදිරිපිට වාඩි වූවාය. මාස කිහිපයක්ම ඇය මවුපියන්ගේද අඩුපාඩු සපුරමින් තමාගේද අවශ්‍යතා සපුරා ගනිමින් රැුකියාව කරගෙන ගියාය. ටික දිනක් යනවිට වෙළෙඳ කලාපයේ අරලිය ගස් හෙවනේ සිටි සමනළයකු ඇය වෙත පියඹා ආවේය. 

දින කිහිපයක්ම සමනළයා ඇය වටේ කැරකී පියඹා ගියේය. තමාගේ මිතුරු මිතුරියන් සේවය නිමවීමෙන් පසු සමනළ සමනළියන් මෙන් පියඹා යනු දුටු ඇයගේ සිතද අලූත් හැඟීම්වලින් පිරී ගියාය.

වැඩි දිනක් යාමට පෙර ඇයද තමා වටේ කැරකුණු සමනළයා සමඟ පියඹා ගියාය. එහෙත් තමාගේ පුතා හිතුවක්කාර ලෙස බිරියක් කැඳවාගෙන ඒම ගැන අම්මා වැඩිකැමැත්තක් දැක්වූයේ නැත.

කාලය ගෙවී යද්දී ඇය ගැබිනියක් වූ අතර රැුකියාවට ද සමුදුන්නාය. ටිකෙන් ටික නැන්දම්මා හා ලේලිය අතර යටි හිතේ ගිනි පුපුරු ඇවිළෙමින් තිබිණ. මේ අතර දිනක් ඇයට හදිසි අවශ්‍යතාවකට මුදලක් අවශ්‍ය විය. නැන්දම්මාගෙන් ඉල්ලූවොත් නොලැබෙන බව දන්න නිසා දැන්දම්මාගේ නංගී වෙත ගොස් ණය මුදලක් ඉල්ලා සිටියාය.

මුදල් ලබා ගැනීමට සවසට එන ලෙස පුංචි අම්මා කීවාය. ඒ අනුව සවස ගිය විට පුංචි අම්මා ණය මුදල දී කීවේ එය ගමේ වෙනත් කාන්තාවකගෙන් ඉල්ලා දුන් බවය. අවාසනාවකට මෙන් නියමිත දිනයේ ණය මුදල දීමට ඇයට බැරි විය. මේ අතර ණය මුදල දුන් බව කියන කාන්තාව ඇයට සති පොළේදී මුණ ගැසිණ. අනේ අක්කේ මං කොහොම හරි ලබන සතියේ පොලියත් එක්ක සල්ලි ටික දෙන්නම් කියමින් ඇය පින්සෙණ්ඩු වූවාය. කාන්තාව උඩ ගොස් බිම වැටුණාය.

මොන සල්ලි ද නංගියේ එම කාන්තාව ඇසුවාය. තමා කිසිවකුට ණයට මුදල් නොදුන් බවද එම කාන්තාව කීවාය. ඇය එම කාන්තාව ඉදිරිපිටදීම පුංචි අම්මාට දුරකතනයෙන් කතා කර සිද්ධිය විමසා සිටියාය. පුංචි අම්මා සිද්ධිය හෙළි කළාය. දුව ගෙදර ගිහින් රණ්ඩු වෙන්න එපා. ඔය සල්ලි දුන්නේ අපේ අක්කා (නැන්දම්මා) පොලිය ගන්න ඕන නිසයි.

පුංචි අම්මාගේ කතාවෙන් පසු ගෙදර ගිය ඇය තමාගේ පුතාටත් පොලියට සල්ලි දෙන අම්මලා ඉන්නවා යයි කියමින් කෑ ගසන්නට වූවාය. අවසානයේ කෙහවලූ පටලවා ගත් නැන්දම්මාත් ලේලියත් නතර වූයේ පොලිසියේ විවිධ පැමිණිලි අංශයේය.