අනුරපුර රෝහලේ ප‍්‍රතිකාර ලබමින් සිටි රෝගියකු දිවා කාලයේ හීනෙන් හූ කීම නිසා එම ස්ථානයට ළඟාවූ කාර්ය මණ්ඩලය ඇතුළු රෝගීහු විනෝදයට පත්වූහ. දිනය පස්වැනිදාය. අනුරපුර රෝහලේ වාට්ටු අංක 18ය. රෝගියා තඹුත්තේගමට ආසන්න ගමක වෙසෙන්නෙකි. එදින මෙම රෝගියා    රෝහලෙන් පිටත්වීමට නියමිතව සිටියේය. දහවල් 11.30 පමණ තවත් රෝගීන් කිහිප දෙනෙකු රැඳී සිටි ස්ථානයට ඔහු පැමිණියේය. එම  ස්ථානයේ කතා බහට ලක්වුයේ මත් වතුර බොන අයට නම් කිසිම පපුවේ අමාරුවක් හැදෙන්නේ නැහැනේ යන මාතෘකාවයි. ඒ අවස්ථාවේ මේ රෝගියා ”මම නම් හොඳට ගහනවා. අද  යනකොටත් ෂොට් එකක් දාලා තමයි යන්නේ” යනුවෙන් කියන්නට විය. මේ කතාව බොහොම අපුරු ලෙස විවිධ උපමා උපමේය තුළින් පටන් ගෙන කතාව හමාර විය. ඉන්පසු මොහු නින්දකට සුදානමින් ඔහුට අයත්  ඇඳට ගොඩ විය.  විනාඩි 10ක්  ගතවීමටත් මත්තෙන් අංක 18 වට්ටු  දෙවනත් වන අයුරින් ඔහු දෙවතාවක් හූ හඬ තලන්නට විය. එතැනට පැමිණියේ වාට්ටුවේ රැඳී සිටි  ජ්‍යෙෂ්ඨ  වෛද්‍යවරයෙකු ඇතුළු හෙදියකි. ඔහුගෙන් තතු විමසීය. ”මං හීනයක් දැක්කා සර්”  කියමින් කතාව හමාර විය. එය අසා සිටි කිහිප දෙනෙක් සිනහ මුසු මුහුණින් ඉන් ඉවත්ව ගියහ. ඉන්පසු සිහිනය  දුටු අය කලින් කතා බහේ නියැලූණු මිතුරන් කිහිප දෙනා අතරට පැමිණියේ ලැජ්ජාව තුරුලූ කරගෙනය. පසුව ඔහු සැබෑම තොරතුරු හෙළිකරන්නට විය. ”මචං මං මාර හීනයක් දැක්කේ. මං ෂොට් එකක් දාන්න ගියා. පොලීසිය මගේ පස්සේ පැන්නුවා. දැන් දවස් දෙක තුනක් ගත්තෙත් නැහැනේ. ඇඟට පණ නැති නිසා දුවගෙන යන්න බැරිව ගියා. ඒ නිසා ළඟම ඇති බැම්මක් උඩට නැග්ගා. අනේ මං ඇදගෙන වැටුණා. ඔළුව පහළටත් කකුල් දෙක උඩටත් හිටින විදිහටයි වැටුණේ. මං ඒකට බයවෙලයි කෑගැහුවේ” යැයි පැවසීය.