(මහියංගන රංජිත් කරුණාවීර)
කාර්යාල පුහුණුව සඳහා ගිය තම පේ‍්‍රමවන්තිය කාර්යාලයේ තරුණයකු සමඟ පේ‍්‍රම සම්බන්ධතාවක් පටන්ගැනීම හේතුවෙන් උරණ වූ මුල් පේ‍්‍රමවන්තයා කාර්යාලය තුළටගොස් නව පෙම්වතාට පහරදීමේ සිද්ධියක් මහියංගන ප‍්‍රදේශයේ රජයේ කාර්යාලයකදී පසුගියදා වාර්තා වූ අතර, ගුටි බැට හුවමාරුවෙන් නව පෙම්වතාට රෝහල් ගතවන්නට සිදුවී ඇති අතර, මේ වන විටත් ඔහු මහියංගන මූලික රෝහලේ නේවාසික ප‍්‍රතිකාර ලබමින් සිටී.


සිද්ධිය සැකෙවින් මෙසේය.
මහියංගන රජයේ කාර්යාලයේ පුහුණුව සඳහා තරුණියක් පැමිණ ඇති අතර, එසේ පැමිණෙන විටත් මිනිපේ ප‍්‍රදේශයේ තරුණයෙකු සමඟ පේ‍්‍රම සම්බන්ධයක් තිබී ඇත. ටික කලකින් ඇය කාර්යාලයේ තරුණයකු සමඟ පේ‍්‍රම සම්බන්ධයක් ආරම්භ කර ඇති අතර, මේ සම්බන්ධය ගැන පැරැුණි පේ‍්‍රමවන්තයාට වටින් ගොඩින් ආරංචි ලැබී ඇත.


මේ ආරංචිවලින් කෝපයට පත් පැරැුණි පේ‍්‍රමවන්තයා පසුගිය දින මහියංගන රජයේ කාර්යාලයට කාර්යාල වේලාව තුළදී කඩාවැදී තම පෙම්වතියගේ නව පේ‍්‍රමවන්තයාට යතුරුපැදි හෙල්මටයෙන් පහර කිහිපයක් ගසා ඇත. රණ්ඩුව බේරීමට ගිය කාර්යාලයේ අනෙකුත් කාර්යාල නිලධාරීන්ට ද ඔහු පහර දෙන්නට පටන් ගැනීම හේතුවෙන් කාර්යාල සේවකයින් එක්වී මුල් පෙම්වතාට හොඳටම පහරදී ඇත.


මෙම ආරවුල සම්බන්ධයෙන් මුල් පෙම්වතාගේ නිවසට ආරංචිවී ඇති අතර, පොලිස් නිලධාරියෙකු වූ ඔහුගේ පියා පැමිණ තම දරුවා රැගෙනගොස් ඇත.
එම කාර්යාලයේ නිලධාරීන් මහියංගන පොලිසිය වෙත සිද්ධිය පැමිණිලි කර ඇති අතර, සිද්ධිය සම්බන්ධයෙන් විමර්ශන කටයුතු මේ වන විටත් සිදුකෙරේ.
එම කාර්යාලයේ ප‍්‍රහාරයට ලක්වූ තරුණ නිලධාරියා ප‍්‍රතිකාර ලබා ගැනීම සඳහා මහියංගන මූලික රෝහලට ඇතුළත් වී ඇති අතර, පහරදීම සිදු කළ පෙම්වතා ද කාර්යාලයේ නිලධාරීන් තමාට පහර දුන් බව පවසමින් රෝහල්ගතවී සිටියේය.