කුකුළන් කෙටවීම නීතිවිරෝධී ක‍්‍රියාවක් වුවද ඉඳහිට මුදල් ඔට්ටුවට කුකුළන් කෙටවීම රහසිගතව සිදුවන බව නොරහසකි. පසුගිය දිනෙක, අයෙක් තම පොර කුකුළාවද රැගෙන මිතුරන් සමගින් එක්තරා ස්ථානයකට ගියේ ත‍්‍රීරෝද රථයකිනි. අනෙක් පොර කුකුළා හිමි තැනැත්තා හදිසි අවශ්‍යතාවක් සඳහා පිටව ගොස් සිටි අතර, පැය භාගයකින් පැමිණෙන බව ඔහු තම දුරකථනයෙන් ඔවුනට දැන්වීය.


ඔහු පැමිණෙන තුරු ත‍්‍රිරෝද රථයට වී සිටි පොර කුකුළා රැුගෙන ආ පිරිස අහළ පහළ අයට හොරෙන් ගංජා සුරුට්ටුවක් උරන්නට වූහ. පැය භාගයකින් පැමිණි අනෙක් පොර කුකුළාගේ හිමිකරු, ‘‘එහෙනම් වැඬේ පටන් ගමුයි’’ පැවැසීය. 


පොර කුකුළන් පිටියට මුදාහල විට දහ දොළොස් දෙනා ඔට්ටු අල්ලන්ට වූයේ රුපියල් දහසේ දෙදහසේ නෝට්ටු වලිනි. ති‍්‍රරෝද රථයෙන් සටනට පැමිණි පොර කුකුළා මීට පෙර පැවැති සටන්වලදී ජයග‍්‍රහණ ලැබූ එකෙකි.


‘‘අපේ එකා දෙයි අරූට නිල් වෙන්න’’ අයෙක් පැවසුවේ ගංජා සුරුට්ටුවෙන් මත්වී හඬනගා සිනාසෙමිනි.


නමුත් අවාසනාවකි. සටන් නොකළ එම පොර කුකුළා නිදිමත ගතියෙන් වැනෙන්නට වූයේ, අවට සිටියවුන්, මවිතයට පත්කරමිනි. අනෙකාගේ පහරින් ඌ බිම ඇද වැටුණි. ත‍්‍රිරෝද රථයෙන් පැමිණි පොර කුකුළා පරාජියට පත්විය. පසුව කාරනය වැටහිණි. ඔවුන් ගංජා සුරුට්ටුව පානය කර තිබුණේ පොර කුකුළාවද ළඟ තබා ගෙනය. පොර කුකුළාට ගංජා දුම ආඝ‍්‍රහණය වීමෙන් ඌ මත්වී ඇති බව කරුණු කාරණා දන්නා අයෙක් පැවසීය.


‘‘අපරාදේ මගේ රුපියල් පහළොස් දාහ’’ පැරදුණු අයෙක් පැවසුවේ සුසුම් හෙලමින්. ගම්පහ දිස්ත‍්‍රික්කයේ ප‍්‍රධාන රෝහලක් පිහිටි නගරයකින් අසන්නට ලැබිණි.