ගම්පහ තරුණයකු කොළඹ බැංකුවක සේවය කරද්දී එහි සේවයට පැමිණි තරුණියක මුණ ගැසිණි. ටික දිනක් යන විට දෙදෙනා බෙහෙවින් සමීප ඇසුරකට පැමිණ වැඩි කලක් යාමට ප‍්‍රථම තරුණිය සිය මිතුරාට යෝජනාවක් ගෙනාවාය. තරුණයා එය ප‍්‍රතික්ෂේප කළේය. සිය පේ‍්‍රම යෝජනාවට තරුණයාගේ කැමැත්ත නැති තැන ඔහු සේවයට ගොස් සිටින දිනයක් බලා තරුණිය සිය කලින් පෙම්වතා සමඟ තරුණයාගේ නිවසට ගියාය. තමාගේ නැගණිය කොළඹ බැංකුවක රාජකාරි කරන බව ඇය ඔවුන්ට කීවාය. නැගණිය සමග මේ තරුණයා කාලයක සිට පේ‍්‍රම සම්බන්ධතාවයක් පවත්වාගෙන ගිය බවද කීවාය. මාපියන් පවා ඒ ගැන දන්නා නිසා තරුණයාගේ මාපියන්ගේද කැමැත්ත අවශ්‍ය බව කීවාය. සිද්ධියෙන් කලබලයට පත් තරුණයාගේ මාපියෝ තරුණයා නිවසට පැමිණෙන තෙක් බලා සිට මෙහි අග මුල විමසූහ. පැමිණි අයගේ හැඩරුව ගැන ඔහු මාපියන්ගෙන් ඇසීය. ඒ ගැන සැකසිතුණු ඔහු ෆේස්බුක් වෙබ් අඩවියට පිවිස ඇගේ මිතුරියගේ පිටුවෙහි ඇති ඡායාරූප මාපියන්ට පෙන්වා පැමිණියේ කවුදැයි විමසීය. එක වරම මාපියන් ඔහුට පෙන්නුවේ සිය මිතුරියගේ හා ඇගේ කලින් පෙම්වතාගේ ඡායාරූපයකි. අක්කා සහ අයියාගේ වෙසින් නිවසට පැමිණ ඇත්තේ තරුණිය හා ඇගේ කලින් පෙම්වතා බව දැනගත් මාපියන්ට කිසිවක් සිතා ගත නොහැකි විය.