නිවසක සිදුවූ සොරකම් වැලක් පොල්කටු සෙල්ලමකින් අනාවරණය කර ගැනීමේ අපූරු සිදුවීමක් පසුගියදා බස්නාහිර පළාතේ ප්‍රධාන නගරයකට සම්බන්ධ පොලිස් ස්ථානයකින් වාර්තා විය. මේ නිවසේ අලුතෙන් සේවයට ආ තරුණිය ගෙදරට ඉතා හිතවත් වුවාය.

එහෙත් වසරකට පමණ පසු නිවසේ වූ භාණ්ඩ එක දෙක අතුරු දන් විය. හැඳි ගෑරුප්පු වලින් පටන්ගත් මේ සොරකම පසුව ජංගම දුරකථන දක්වා පුළුල් වීම නිසා ගෙහිමියාගේ සැකය මේ සේවිකාව කෙරේ යොමු විය. එහෙත් ගෙයින් පිටට යාමට කිසිදු ඉඩක් නැති ඇය මෙබඳු දේකට සම්බන්ධ වන්නේ කෙසේ දැයි දැඩි විමසිල්ලෙන් පසුවූ ඔහුට දිනක් දක්නට ලැබුණේ ගෙදර හැමෝම ගෙයින් පිටවූ පසු ගේ පිටුපස වූ තාප්පය මත තිබූ පොල්කටුවක් උඩ අතට හරවා ඇය ඒදෙස බලා සිටි බවකි. ඒ මොහොතේම අල්ලපු ගෙදරින් අතක් මතුවිය.

වටිනා වීදුරු දෙකක් ඒ පැත්තට ගිය අතර ඒ පැත්තෙන් මුදලක් ඇගේ පැත්තට වැටිණ. ගෙදර අය සිටින විට පොල්කටුව යට පැත්තටත් ඔවුන් නැතිවූ වහාම පොල් කටුව උඩ පැත්තටත් හැරවෙන බව හා ගනුදෙනුව සිදුවන ආකාරය පොලිස් ස්ථානයේදී සේවිකාව අතින් කියවුණේ ඇගේ කඳුළු බේරෙන දෑසින්ලු.

(තිහගොඩ උපසේන ලියනගම) ​