(මොරගොල්ලාගම සිසිර කැලේගම)
ගෑස් නොමැතිව වසා තිබූ ආපන ශාලාවකට ගෑස් සිලින්ඩරයක් ලැබීමත් සමගින් එය විවෘත කිරීමෙන් අනතුරුව දෙවියන්ගේ නුවණ හා ආශිර්වාදය ලැබෙන්නට දෙවියන්ට පලතුරු වට්ටියක් තැබීමට ගෙනා පලතුරුවල මිල ගණන් ඇසීමෙන් කඩ හිමියාගේ මොළේ කොළොප්පන් වූ පුවතක් කුරුණෑගල නගරය අවට සීමාවක ආපන ශාලාවකින් අසන්නට ලැබුණි.

‘‘ගෑස් නැත - වසා ඇත.’’ යනුවෙන් දින කිහිපයක් ආපන ශාලාව වසා තැබූ වෙළෙඳ හිමියා ගෑස් පෝලිමට ගොස් ගෑස් සිලින්ඩරයක් මිලදී ගත්තේය.

එහෙත් ගෑස් සිලින්ඩරය එක් දිනකටවත් මදිය. එනිසා ගෑස්වලින් තිබෙන පරිදි එය පවත්වාගෙන යන බව පවසා ඔහු සේවකයන් හා කැටුව ආපන ශාලාව විවෘත කළේය.

සිරිත් පරිදි තෙල්, මල්, පහන් පත්තු කර වැඩ පටන් ගත් නමුත් එහි තිබෙන දෙව්රුවට තබන්නට ගෙදරින් ගෙනා පලතුරු කිහිපයක් ඇතත්, අන්නාසි හා ගස්ලබු නැත. සේවකයකුට මුදල් දී ඔහු පිටත් කර යැව්වේ එම පලතුරු දෙක මිල දී ගෙනෙන ලෙසටය.

ඒ අනුව නික්ම ගිය සේවකයා ගස්ලබු ගෙඩි දෙකක් හා අන්නාසි ගෙඩි දෙකක් ගෙනාවේය.

‘‘පුෂ්ටිමත් නැහැනේ’’ වෙළෙඳ හිමියා ඒවා පරීක්ෂා කරමින් කීය.

‘‘මොන පුෂ්ටිමත් ද, මේ ඇඟිටි පැපොල් ගෙඩි දෙකට රුපියල් 560 යි. ගැට අන්නාසි ගෙඩි දෙකට රුපියල් 370 යි. තව පලතුරු ගන්න ගියා නම් සල්ලි මදිවෙනවා. දුන්න මුදලට හරියන්න තමයි ඔය ගෙනාවේ’’යි සේවකයා පැවසීය.

‘‘බඩු මිල හමුවේ දෙවියන්ගේ පිහිට ලබන්න ගියොත් අපි තවත් අමාරුවේම තමා වැටෙන්නේ කියා’’ ගෙනාවා වෙනුවට පලතුරු වට්ටිය තබන්නට කඩ හිමියා කටයුතු කරද්දී රැස්ව සිටි පිරිස ඒ දෙස බලා සිටියාලු.