ගාලූ දිස්ත‍්‍රික්කයේ එක්තරා ගමක පවත්වන ලද අලූත් අවුරුදු උත්සවයකි. තරගාවලියේ ප‍්‍රධානතම අංගය වූයේ අවුරුදු කුමාරිය තේරීමේ තරගයයි. රූමත් තරුණියන් දහ දොළොස් දෙනෙක් චීත්ත රෙදි හා හැට්ට හැඳගෙන සිය රූ සපුව වඩ වඩාත් ඔප මට්ටම් කරගෙන වේදිකාව මත පෙනී සිටියහ. විනිශ්චය මණ්ඩලය බරපතළ අභියෝගයකට මුහුණපා අවසන තම අපක්ෂපාතී තීරණය නිවේදකයා හට ලිඛිතව දුන්හ. නිවේදකයා බොහෝසේ හැඩ වැඩ දමා අවසන් ප‍්‍රතිඵලය ප‍්‍රකාශයට පත් කළේ සුවහසක් නරඹන්නන්ගේ වේගවත් අත්පොළසන් හඬ මධ්‍යයේය. එහිදී කිසිම කෙනකු නොසිතූ අපූරු සිදුවීමක් විය. තරගකාරියන් අතර සිටි එක් කටකාර යුවතියක් ඉදිරියට පැන නිවේදකයා අත තිබූ මයික‍්‍රපෝනය උදුරා ගත්තාය. ඇය උත්සව සභාව අමතන්නට වූවාය. මේ විනිශ්චය මණ්ඩලය හරිම අසාධරණ විධියටයි කටයුතු කළේ. බලන්න මේ තුන් දෙනා ඇත්තටම ලස්සන ද කියලා. මට කිසිම ප්ලේස් එකක් නෑ. ඔයාලා කියන්න මම ලස්සන නැද්ද?  ඕ මහ හඬින් හැඬුම්බර ස්වරයෙන් ඇසුවාය. සුවහසක් නරඹන්නන් වෙතින් මුළු පළාතම ගිගුම් දෙන අයුරින් මහා හූ හඬක් නැගුණි. යුවතිය මහ හඬින් හඬමින් වේදිකාවෙන් බැසගියාය.