දියේ ගිලී මියගියත් පොලිස් අත්අඩංගුවට නම් පත්විය නොහැකියැයි පැවසූ තරුණයෙක් පිළිබඳ පුවතක් ගම්පහ දිස්ත‍්‍රික්කයේ ගම්මානයකින් වාර්තා වේ.
පොලිස් පිරිසක් මේ ගම්මානයට ගියේ මත්කුඩු උරන තරුණ පිරිසක් ඉන්නා බවට ලත් තොරතුරක් අනුවය.

සැකකරුවන් දෙතුන්දෙනකු අල්ලා ගත්තත් මේ කණ්ඩායමේ නායකයා අල්ලා ගැනීමට බැරිවිය. පිරිසේ නායක නිලධාරියා සැකකරුවන් සමග නිලධාරීන් පිටත් කර හැරියේ ඔවුන් ළඟ තබාගෙන සිටීම අපහසු නිසාය.

කණ්ඩායම බාර නිලධාරියා සගයකු සමග යද්දී තවත් සැකකරුවෙකු අල්ලා ගැනීමට හැකිවූ අතර පිරිසේ නායකයා වෙල් යායේ ඇනිකට් එක අසල කුඩු උරමින් ඉන්නා බව දැනගත් නිලධාරියා එහි ගියේය.

පොලිස් නිලධාරින් දෙන්නා දුටු ප‍්‍රධාන සැකකරු දිය ඇළට පැන්නේ පොලීසියෙන් ගැලවෙන්නටය. සිතුවාටත් වඩා ජල පහර සැර නිසා ඔහුට එහි රැුඳී සිටීම අපහසු විය. ඒ බව දුටු පොලිස් නිලධාරියා ජීවිතය බේරාගැනීමට නම් ගොඩට එන්නැයි ඔහුට කීවේය.

අනේ සර්, දියේ ගහගෙන ගිහින් මළත් ගොඩ නම් එන්න බැහැ. සර්ලා මට නඩු දානවනේ.

අනතුරුව පොලිස් නිලධාරියා ක‍්‍රියාත්මක විය. දියට පැන්නේය. සැකකරු අල්ලා ගොඩට ගෙන ආයේ ඔහුගේ දිවි බේරන අදහසිනි. ඔහු සිටි තැන තිබූ තහනම් මත්ද්‍රව්‍ය ආදියද බාරයට ගත්තේය. පොලිසියට ගෙනවිත් නඩුවක් පවරා අධිකරණයට ඉදිරිපත් කළේය.