ඌරුබොක්ක - ඩී. ඒ. පතිරණ
යාළුවකුගේ දානේ ගෙදරකට යාමට සල්ලි නැතිව ඉඩමක හොරට පුවක් කැඩූ වයස අවුරුදු 19, 20, 21 වයස්වල පසුවන තරුණයක් තිදෙනකු අත්අඩංගුවට ගත් බවට ඌරුබොක්ක පොලිසිය කියයි.
මෙසේ අත්අඩංගුවට ගෙන ඇත්තේ බෙංගමුව දාබෝගල ප්‍රදේශයේ පදිංචි අවුරුදු 19, 21 ක තරුණයන් දෙදෙනකු සහ පස්ගොඩ මීරන්පොළ පදිංචි වයස අවුරුදු 20 ක තරුණයකු ඇතුළු තිදෙනකු බවට පොලිසිය පවසයි.
තරුණයන් තිදෙනා යතුරු පැදි දෙකකින් මෝලොග්ගමුව ප්‍රදේශයේ යහළුවකුගේ නිවසේ දානමය පින්කමකට සහභාගිවීම සඳහා පිටත්ව ඇත. පින්කම් ගෙදරට මොනවා හෝ රැගෙන යාමට අවශ්‍ය වුවත් ඒ සඳහා තිදෙනා ළගම මුදල් තිබී නැතිව සිටියදී මුදල් සොයා ගැනීම සඳහා තරුණයන් තිදෙනාම එක්ව අසල ඉඩමකට පැන පුවක් කඩා ඇති බව අනාවරණය වී යැයි පොලිසිය කියයි.
එක් තරුණයකු ගසකට නැග පුවක් කඩාගෙන බසින අතරතුර ඉඩමේ අයිතිකරු පැමිණිමත් සමගම ඒ අවස්ථාව වනවිට කඩා තිබූ පුවක් ගෙඩි තුන්දහසක පමණ ප්‍රමාණයද දමා ඔවුන් පලා ගොස් ඇතැයි පොලිසිය පැවැසීය.
මේ අතරතුර ඉඩම් හිමිකරුට පලා ගිය එක් අයෙකුගේ තාවකාලික රියැදුරු බලපත්‍රයක් බිම වැටී තිබි හමු වී ඇති අතර එම කොළයත් රැගෙන ඉඩමේ හිමිකරු පොලිසියට පැමිණ පැමිණිලි කිරීමෙන් අනතුරුව පොලිසිය පුවක් හොරුන් සොයා ගැනීම සඳහා පරීක්ෂණ ආරම්භ කළේය.

ඒ අනුව තාවකාලික රියදුරු බලපත්‍රය හිමි පස්ගොඩ මීරම්පොළ ප්‍රදේශයේ පදිංචි තරුණයා අත්අඩංගුවට ගෙන ප්‍රශ්න කිරීමේදී පුවක් කැඩීමට පැමිණ පලා ගිය අනිත් තරුණයන් දෙදෙනා පිළිබඳවද තොරතුරු අනාවරණය කිරීමෙන් පසු ඔවුන් දෙදෙනාද අත්අඩංගුවට ගෙන ඇතැයි පොලිසිය කියයි. උරුබොක්ක පොලිස් ස්ථානාධිපති ප්‍රධාන පොලිස් පරික්ෂක ටී.පී.ඩබ්. පල්ලියගුරුගේ මහතාගේ උපදෙස් අනුව අපරාධ අංශයේ ස්ථානාධිපති උප පොලිස් පරික්ෂක පතිරත්න මහතා ඇතුළු නිලධාරීහු කණ්ඩායමක් සැකකරුවන් අත්අඩංගුවට ගැනීමට කටයුතු කළහ.
අත්අඩංගුවට ගැනුණු තිදෙනා මොරවක මහේස්ත්‍රාත් අධිකරණයට ඉදිරිපත් කිරීමට නියමිතය.