තමාගේ කාර්යාලයීය බෑගය යයි සිතා සිය නීතිඥ මිතුරාගේ බෑගය රැගෙන ගොස් අලි ජංජාලයක්වූ පුවතක් ප‍්‍රධාන නගරයකින් වාර්තාවේ.


ඔවුහු හොඳ යහළුවෝය. කොළඹ වැඩකරන ඔහු එදා රාත‍්‍රියේ සිය නීතිඥ මිතුරා හමුවීමට ගියේ ඔහුගේ නිවසටය. හේ සිය කාර්යාල බෑගයද එහි ගෙන ගියේය. නීතිඥ මිතුරාගේ නිවසට ගිය ඔහු තම බෑගය ඔහුගේ සාලයේ පුටුවක තබා මිතුරාගේ නිවසේ කාර්යාල කාමරයට ගියේ මිතුරාගේ කැඳවීමකට අනුවය.


ඒ වන විටත් නීතිඥ මිතුරා පසුදින උසාවියේ විභාගවෙමින් පවතින නඩු කිහිපයකට අවශ්‍ය ලිපිගොනු සිය බෑගයේ දමා සකස් කොට කාර්යාල මේසය මත තබා තිබුණේය. මිතුරා පැමිණීමත් සමගම සියලූ වැඩකටයුතු පසෙක දමා නීතිඥ මිතුරා ඔහු සමග හරි හරියට කතාවට වැටුණේය. ඒ ඔවුන් දෙදෙනා කාලයකින් හමුනොවූ නිසාය. මේ දෙදෙනාටම තිබුණේ එකම වර්ගයේ බෑග් දෙකකි. ඒ කාලයකට ඉහතදී ඔවුන් දෙදෙනා එකම වෙළෙඳසලකින් ගත් බෑග් දෙකකි.


රාත‍්‍රිය කෙමෙන් කෙමෙන් ගෙවීයමින් තිබුණේය. මම දැන් ගෙදර යන්නම් කියා ඔහු වාඩිවී සිටි පුටුවෙන් නැගිට්ටේ තමාගේ කාර්යාල බෑගය යයි සිතා මේසය මත තිබූ නීතිඥ මිතුරාගේ බෑගයද අතට ගනිමින්ය. නීතිඥ මිතුරාටත් මෙය තමාගේ බෑගය යයි අමතකවූ නිසා ඔහු මේ බෑගය රැගෙන සිය නිවසට ගියේය.


පසුදා උදෑසනින්ම අවදිවූ නීතිඥ මිතුරා තමා බෑගයේ දමා තිබූ එදින විභාගවෙමින් පවතින නඩු කිහිපයක ලිපිගොනු පරීක්ෂා කිරීමට සිය කාර්යාල කාමරයට ගියේය. පෙරදින රාත‍්‍රියේ තමා දමා තිබූ ලිපිගොනු සහිත බෑගය කාර්යාලයේ නොතිබෙනු දුටු ඔහු හොඳ හැටි බියවිය. සොයා බැලීමේදී තමාගේ බෑගයට සමාන බෑගයක් සිය නිවසේ සාලයේ තිබෙනු දුටු නීතිඥ මිතුරාට සිදුවූ දේ තේරුම් ගැනීමට වැඩි වේලාවක් ගතවූයේ නැත. තමාගේ බෑගය සිය මිතුරා වැරදී ගෙන ගොස් ඇති බව ඒත්තු ගිය ඔහු මිතුරාට දුරකතන ඇමතුමක් ලබාදුන්නේ වැරැද්ද නිවැරදි කර ගැනීමටය.


ඒ වන විටත් මිතුරා එම බෑගයත් රැුගෙන රාජකාරිය සඳහා සිය නිවසින් කොළඹ බලා යාමට පිටත්වී තිබුණි. කෙසේ හෝ මේ බෑග් පටලැවිල්ල බේරා ගැනීමට එදින ඔහුට වරුවක් නිවාඩු දැමීමට සිදුවුවද සිය මිතුරාට උසාවි යාමට ඔන්න මෙන්න කියා තිබියදී බෑගය ගෙනත් දීමට තරම් ඔහු කඩිසර නොවුණි නම් තත්ත්වය මීට වඩා නරක අතට හැරෙන්නට බොහෝ දුරට ඉඩකඩ තිබුණි.