බීම වීදුරුවක් සම්බන්ධයෙන් හටගත් බහින්බස්වීමක් මහා ගුටිබැට හුවමාරුවක් දක්වා දුරදිග යාම හේතුවෙන් විවාහ මංගල උත්සවයක ඇතිවූ කලබලයක් සංසිඳුවීමට පොලිසිය පවා ගෙන්වීමට සිදුවීමේ පුවතක් කුරුණෑගලින් වාර්තාවේ.

 කුරුණෑගල නගරයේ දෙපිරිසක් අතර පැවැති මෙම විවාහ මංගල්‍යය ප‍්‍රදේශයේ හෝටලයක පැවැත්විණි. එයට සහභාගිවූ  දෙපිරිසේ දෙදෙනකු අතර බීම වීදුරුවක් සම්බන්ධයෙන්  ආරවුල  ඇතිවී තිබේ.

 අවසානයේදී එම ආරවුල මහා ගැටුමක් බවට පරිවර්තනය වී මනාලයාගේ සහ මනාලියගේ පාර්ශවයේ දෙපිරිස හෝටලය තුළත් හෝටලයට පිවිසෙන මාර්ගයේත්  එකිනෙකා ගුටිබැට හුවමාරු කරගත්හ.

මෙම කලබලයෙන් කම්පනයට පත් මනාලිය සහ ඇගේ මවට ක්ලාන්තය සෑදීමෙන් ඔවුන්ට ප‍්‍රතිකාර ලබාදීමට පවා සිදුවිය. අවසානයේදී ගැටුම සමථයකට පත්කරවීමට 119 හදිසි අංකයට කතාකොට පොලිසිය ගෙන්වීමට හෝටල්  බලධාරීන්ට සිදුවිය.