(බිංගිරිය - වික්ටර් සෝමවීර)

භූතයෙකු දමා සිරකළ බව කියන ප්ලාස්ටික් ඇසුරුමක් සමග තවත් පරිවාර ඇසුරුම් කීපයක් ත්‍රීරෝද රථයකින් ගමන් කළ පිරිසක් විසින් බරාගෙදර කාරඹුඔය පාලම යටට විසිකරනු ලැබීම හේතුවෙන් බරාගෙදර හා කැලෑගෙදර අවට ප්‍රදේශවාසීහු පසුගියදා මහත් කැළඹීමකට පත්වූහ.

භූතයා ප්‍රවාහනය කළ ත්‍රීරෝද රථය පිටුපස යතුරුපැදියකින් ගමන් කරමින් සිටි අයෙකු යම්කිසි සැකකටයුතු පාර්සලයක් වැනි යමක් කාරඹුඔයට විසිකරන අයුරු දැක ඒ පිළිබඳව ත්‍රීරෝද රථයේ සිටි අයගෙන් විමසා ඇත. එවිට ඔවුන් පවසා ඇත්තේ දේවාලයක සිට රැගෙන ආ භූතයකු කාරඹුඔයට විසිකළ බවයි. බෝම්බ පිපිරීම ගැන මේ දිනවල බියක් පවතින හෙයින් මෙම සිද්ධිය සම්බන්ධ ආරංචිය ප්‍රදේශය පුරා ඉක්මනින් පැතිර ගියේය. මෙම කාරඹුඔය හරහා පිහිටා තිබෙන බරාගෙදර පාලම බෝවත්ත කුලියාපිටිය මාර්ගයට සම්බන්ධ වී පවතී. දිනපතා වාහන විශාල ප්‍රමාණයක් මෙම පාලම මතින් ගමන් කරන බැවින් යම් අනතුරක් සිදුවේ යැයි බියෙන් සිද්ධිය දුම්මලසූරිය පොලිසිය වෙතද දැනුම් දී තිබුණි.

ඒ අනුව වහා ක්‍රියාත්මක වූ දුම්මලසූරිය පොලිසිය නාවික හමුදාව දැනුවත් කොට ඇත කාරඹුඔයට විසිකරන ලද ප්ලාස්ටික් ඇසුරුම් තුළ පුපුරණ ද්‍රව්‍ය ඇතැයි යන සැකය නිසා නාවික හමුදා නිලධාරින් එම ස්ථානයට පැමිණෙන තෙක් දුම්මලසූරිය පොලිසිය එම ස්ථානයට විශේෂ ආරක්ෂාවක් ද සලසා තිබුණි. නාවික හමුදා නිලධාරින් පැමිණ බරාගෙදර පාලම යට වතුරේ පාවෙමින් තිබුණ ප්ලාස්ටික් ඇසුරුම් ගොඩට ගෙන පුපුරවා හැරීමට කටයුතු කළේය. එහෙත් ඒවා තුළ කිසිදු පුපුරණ ද්‍රව්‍යයක් නොතිබිණි. මේ පිළිබඳව දුම්මලසූරිය පොලිස් ස්ථානාධිපති ප්‍රධාන පොලිස් පරීක්ෂක අතුල ගමගේ මහතාගෙන් කළ විමසීමේදී කිසිදු පුපුරණ ද්‍රව්‍යයක් හමුනොවුන බව කියා සිටියේය. කෙසේ වෙතත් ත්‍රීරෝද රථයේ ගමන් කළ පිරිස මුස්ලිම් අය බවට පොලිසිය වෙත තොරතුරු ලැබී තිබෙන හෙයින් සීසීටීවී කැමරා දර්ශන උපයෝගී කරගෙන අදාළ ත්‍රීරෝද රථය අත්අඩංගුවට ගැනීම සඳහා දුම්මලසූරීය පොලිස් ස්ථානාධිපති ප්‍රධාන පොලිස් පරීක්ෂක අතුල ගමගේ මහතාගේ මෙහෙයවීමෙන් වැඩිදුර පරීක්ෂණ පවත්වාගෙන යයි.