කඬේට පැන්න හොරාගේ අතේ තිබුණු පච්චයක් සී.සී.ටී.වී කැමරාවක සටහන් වී තිබීම නිසා හොරා අපහසුවකින් තොරව අල්ලා ගැනීමට කඩ හිමියාට හැකි වූ සිද්ධියක් කොළඹට ආසන්න ප‍්‍රදේශයකින් අසන්නට ලැබුණි. 

කඩ හිමියා රාත‍්‍රී වෙළෙඳසල වසාදමා එහි සවි කර තිබූ සී.සී.ටී.වී. කැමරා ක‍්‍රියාත්මක කර නිවසට ගොස් පසුදා අලූයම පැමිණ බලද්දී වෙළෙඳසැලේ දොරගුළු විවෘත කර තිබෙනු දැක ඒ ගැන සොයා බලා ඇත.

වෙළෙඳසලේ ලාච්චුවක තිබූ මුදල් හා වටිනා භාණ්ඩ සොරාගෙන තිබෙන බව වටහාගත් කඩ හිමියා සී.සී.ටී.වී. කැමරා පරීක්ෂා කරද්දී හොරෙකු ඇතුළු වී සිටි අයුරු දැක තිබේ.

සොරා මුහුණ වසාගෙන සිටි නිසා හඳුනාගැනීමට අපහසු වුවත් අතේ තිබුණ පච්චයක් හොඳින් සටහන් වී තිබූ නිසා කඩ හිමියා විමසිල්ලෙන් සිට ඇත. පසු දිනක එම පච්චය කොටා ගත් තරුණයකු වෙළෙඳසල අසල සිටිනු දැක පසුව පොලිසිය මාර්ගයෙන් ඔහුගෙන් ප‍්‍රශ්න කරද්දී කළ සොරකම ගැන හෙළි වී ඇත.