එක්තරා තරුණයකු පැමිණිල්ලක් කිරීමට පොලිසියට ගියේය. ඔහු ගියේ යතුරුපැදියෙනි. එය පොලිසිය ඉදිරිපිට නවතා ඔහු හිස් වැසුමද පොලිසිය තුළට රැගෙන ගියේ එය යාලූවෙකුගෙන් ඉල්ලා ගත් එකක් නිසාය. තරුණයා හිස් වැසුම පසෙක තබා පැමිණිල්ල ඉදිරිපත් කරන්නට විය. ටික වේලාවක් යනවිට එතැනට පැමිණි පොලිස් නිලධාරියකු හිස්වැසුම දෙස හොඳට බලා ”හා බඩු ළඟටම ඇවිල්ලා” කියමින් තරුණයාට දෙකක් ඇන්නේය. හිස් වැසුම මේ පොලිස් නිලධාරියාගේය. එය මෙයට දින කිහිපයකට පෙර කිසිවකු විසින් සොරකම් කර තිබිණ. පොලිස් නිලධාරියා සිතුවේ හිස්වැසුම සොරකම් කර ඇත්තේ මේ තරුණයා විසින් බවය. එහෙත් තරුණයා දිවුරා කිව්වේ මෙය තමා සොරකම් නොකළ අතර යාලූවෙකුගෙන් ඉල්ලා ගෙන පැමිණි බවය. මෙය තමා සොරකම් කළා නම් පොලිසියට ගෙන නොඑන බවද ඔහු කීවේය. ඒ කිසිවක් ගණනකට නොගත් පොලිස් නිලධාරියා රුපියල් දහසක් වටිනා ආරක්‍ෂිත හිස් වැස්මක් සොරකම් කිරීම සම්බන්ධයෙන් එම අවස්ථාවේම තරුණයාට විරුද්ධව පැමිණිල්ලක් සටහන් කළේය. පසුව පොලිසිය විසින් ඔහු අධිකරණයට ඉදිරිපත් කළ අවස්ථාවේ හිස්වැසුම ඔහුට දුන් බව කියන තරුණයා ද අධිකරණයට ඉදිරිපත් විය. දෙදෙනාම රුපියල් දහස බැගින් වූ මුදල් ඇප මත මුදා හැරීමට ගාල්ල ප‍්‍රධාන මහේස්ත‍්‍රාත් යූ.එස්. කලංසූරිය මහතා නියෝග කළේය.