උදාවෙන නව වසර වෙනුවෙන් බලපිටියේ ගමක තරුණ පිරිසක් දානයක් දීමට සාම්බාරු හොද්ද හදන්න ගොස් අලි අමාරුවක වැටුණු පුවතක් අසන්නට ලැබිණ.

ප්‍රදේශයේ ජනතාව වෙනුවෙන් ඔවුන් මේ දානය දෙන්නේ නව වසර එළඹීම නිමිත්තෙනි. දානය මුළුමනින්ම නිර්මාංශිකය. එළවළු වෑන්ජන සහිතව දානය දෙනු ලැබේ. තක්කාලි සම්බල සහ සාම්බාරු හොද්ද අනිවාර්යය. සාම්බාරු හොද්දට මේ අතරින් හිමිවනුයේ ප්‍රධාන තැනය.

එදාත් ඔවුහු සාම්බාරු හොද්ද හදමින් සිටියහ. හාරපන්සීයකටම අවශ්‍ය නිසා ඉතා විශාල වළඳක් මේ සඳහා යොදා ගත්හ. ඒ විතරක්ම නොව ඊට අවශ්‍ය දෑ එකතුකර හොද්ද තැම්බීමට ලිපේ තබා තිබුණි. ඒ සඳහා අවශ්‍ය සාම්බාරු ගෙන ඒමට පංගාර්තු කළේ වෙනත් දෙයක් ගෙන ඒමට ගිය අයෙකුට දුරකතන ඇමතුමක් ලබාදෙමිනි.

ඔහු තමන්ට ගෙන ඒමට පැවසූ දේ සංවිධායක තරුණයකුට දුන්නේ එය මොකටදැයි නොඅසාය. තමන්ට එම දේ ගෙන එන්නට යයි කියන්න ඇත්තේ පූජාවක් සඳහා විය යුතුයැයි සිතූ ඔහු හනිකට නිවසට ගියේ ඇඟපත සෝදා ඇඳුමක් ඇගලාගෙන ඒමටය.

  කිසිදු වගවිභාගයකින් තොරව ගොට්ටකට ඔහු රැගෙන ආ සාම්බාරු පැහි පැහී එන හොද්දට දැමූවේ සංවිධායක තරුණයෙකි. ඒ සමගම හොද්දෙන් ආවේ සාම්බ්‍රානි සුවඳය. තරුණයින්ට මේ ගැන සැක සිතිණ. ඒ සමගම කුඩු ගේන්න යයි කී තරුණයාට දුරකතන ඇමතුමක් ලබාදුන්නේ ඇත්තටම ඔහු ගෙන ආවේ සාම්බාරු කුඩු ද යන්න දැන ගැනීමටය.

ඇත්තටම දුරකතනයෙන් ඔහුට ඇසී ඇත්තේ තමාට ගේන්න යයි කීවේ සාම්බ්‍රානි කුඩුය යනුවෙනි. ඒ අනුව ඔහු ගෙනැවිත් ඇත්තේ සාම්බ්‍රානි කුඩුය. සිදුවූ දේ හැමෝටම වැටහී හමාරය. හද හදා සිටි සාම්බාරු හට්ටිය විසි කිරීම හැර වෙනත් විකල්පයක්  නොතිබුනාලු‍.

කරන්දෙණිය එම්. සුසිල් පියන්ත