ලෝක ළමා දිනය මෙන්ම වැඩිහිටි දිනය ද පසුගිදා සැමරිණි. විශ‍්‍රාම සුවයෙන් පසුවන තම පියාට තිළිණයක් රැගෙන යා යුතු යැයි කල්පනා කළ පුතකුට, පියාගේ ජංගම දුරකථනය දින කිහිපයක සිට අක‍්‍රීය වී ඇති බව මතක් විය.

සේවය නිමාවී ජංගම දුරකථන අලෙවි සැලකට ගොඩ වූ හෙතෙම තම වැටුපෙන් ඉතිරි කරගත් රුපියල් හය දහසෙන් අලූත්ම ජංගම දුරකථනයක් මිලදී ගෙන, තම පෙම්වතිය හමුවී, මුහුද වෙරළට ගොස්, අල්ලාප සල්ලාපයේ යෙදෙන්නට විය. පෙම්වතා රැගෙන ආ බෑගය පරීක්‍ෂා කළ පෙම්වතිය අලූත් දුරකථනය දැක අමන්දානන්දයට පත්වූවාය. ‘‘ඔයා මට ගෙනාපු තෑග්ග හංගගෙන හිටියා නේද හරිම කපටියෙක්’’ යැයි කියමින් ඇය ජංගම දුරකතනය පරීක්‍ෂා කරන්නට වූවාය. ‘‘මේක ඔයාට නෙමේ හලෝ’’ යැයි පෙම්වතා පැවසූවිට, ”තව බොරු කියන්නත් එනවා’’ යයි තෙපලූ ඇය තම ජංගම දුරකතනය ගලවා එහි තිබූ සිම්පත අලූත් දුරකතනයට දමා ‘‘ෆෝන් එකට තෑන්ක්ස්’’ යැයි කියමින් හාදුවක්ද දුන්නාය. පෙම්වතාට කටඋත්තර නැතිවිය. තවත් දුරකථනයක් ගැනීමට මුදල් ද නැත.

පසුව ඇයගේ පැරණි දුරකථනය ඉල්ලා ගත් ඔහු ඇයව නිවෙසට හැරලවා පැමිණියේ දුරකථන අලෙවිසලකටය. පෙම්වතියගේ දුරකථනය අලෙවි සලේ අයට දුන් ඔහු ‘‘මේ ෆෝන් එකට හවුසින් එකක් දාන්න යැයි පැවසීය. දුරකථනයට සරිලන හවුසිනයක් තෝරාගත් දුරකථන අලෙවිකරු පැරණි හවුසිනය ඉවත්කර දුරකථනය පිසදමා අලූත් හවුසිනය සවිකළේ රුපියල් දෙසීයකටය. දුරකථනයට අලූත්ම පෙනුමක් ලැබිණි. දුරකථනය අතට ගත් තරුණයා නිවෙස බලා යන බසයකට ගොඩවිය.