කරන්දෙණිය එම්.සුසිල් පියන්ත
නගරයේ වර්ණ රසායනාගාරයක් ඉදිරිපිට ප්‍රියමනාප අයුරින් සංස්කරණය කර ප්‍රදර්ශනය සඳහා ගසා තිබූ කාන්තා ඡායාරූපය සිය භාර්යාවගේ යයි සිතා එම ආයතනය ඉදිරිපිට යකා නටා නූලෙන් ගුටිනොකා බේරුණු අයකු පිළිබද පුවතක් ගාල්ලේ නගරයකින් අසන්නට  ලැබේ.

මේ කාන්තාවගේ ඡායාරූපය ගසා දෑ අවුරුද්දකටත් වැඩිය. එය එහි ප්‍රදර්ශනයට තබා තිබුණේ ඇයගේ ද කැමැත්ත හා අනුමැතිය සහිතවය.

නගරය ආසන්නයේ ගමක මේ තැනැත්තා වාසය කළත් බස් නැවතුම් පොළ ඉදිරිපිට මාර්ගයේ මේ ආයතනය පිහිටා තිබුණු බැවින් මේ කාන්තා රූපය ඔහුගේ නෙත නොගැටෙන්න ඇතිවාට සැකයක් නැත.

එදා ඔහු එම මාර්ගයේ සිටියේ යතුරු පැදියට තෙල් ටිකක් ගහගන්නය. මෙහිදී මේ කාන්තා රූපය දුටු ඔහුගේ ඉහමොළ රත්වී ගියේය. එහෙයින් තැන නොතැන ද අමතක විය.

‘‘යකඩෝ මේ ඉන්නේ මගේ ගෑනිනේ. මේකි මගෙන් අහන්නෙත් නැතිව මෙතන ගහන්න පොටෝ එකක් දීලානේ,’’ කියමින් ඔහු එම ආයතනයට ගියේ කෑ මොර දෙමිනි.

‘තමුසෙලා කොහොමද මගෙන් අහන්නේ නැතිව මගේ නෝනව ප්‍රදර්ශනයට තියන්නේ’ යයි කියමින් ඔහු එතන යකා නටන්නට පටන් ගත්තේය.

ඒ විතරක්ම නොව සිය භාර්යාවට ද ඇමතුමක් ගෙන දෙස් දෙවොල් තිබ්බේය. මේ කතාවෙන් ආත බූත වූ ඇය තමා ප්‍රදර්ශනයට සිය ඡායාරූපයක් නොදුන් බව දිව්රා පැවසුවත් එය මායිම් නොකළ ඔහු ආයතනය සමග දිගින් දිගටම රණ්ඩු කළේය. එහි කාර්ය මණ්ඩලය මෙය ඔහුගේ භාර්යාව නොවන බව පෙන්වීමට කොතරම් මහන්සි ගත්තත් ඔහු කීවේ තමාගෙන් අවසරයක් නැතිව ගැසූ සිය භාර්යාවගේ රුව ගලවා දමන ලෙසය. 

කියනදේ නොඅසන ඔහුට මේ ආයතනයට හිතැති පිරිස යහමින් නෙළන්නට සූදානම් වූ විට එහි කළමනාකරු මේ කතගේ රුව ඔහු පදිංචි ප්‍රදේශයේ අයෙකුගේ නොව වෙනත් ප්‍රදේශයක අයෙකුගේ බව ඔප්පු කිරීමත් සමගම ඔහුට නිහඬවම එතනින් හෙමින්ම ලිස්සා යන්නට සිදුවුණා ලු.