දිනපතා තිතට මත්වී, නිවසටත් ගෙනැවිත් බීම පුරුද්දක් කර ගෙන සිටි බේබදු සැමියකුට බිරිය අරළු කුඩු මිශ‍්‍ර බයිට් දීසියක් සාදා දී මතක හිටින පාඩමක් ඉගැන්වීමේ පුවතක් ලංකාදීපයට වාර්තා වේ.

මහනුවර දිස්ත‍්‍රික්කයේ දුෂ්කර ගම්මානයකින් වාර්තා වන මෙම සිදුවීම සැකවින් මෙසේය.

ඔහු මහනුවරට නුදුරු කුඩා නගරයක පෞද්ගලික ආයතනයක සුළු රැකියාවක් කළ පුද්ගලයෙකි. බිරිය රැකියාවක් නොකළ අතර දරුවන් දෙදෙනාගේ කටයුතු මෙන්ම සැමියා හා ගෙදර දොරේ දහසක් දේද කරමින් ඇය සැමියාටත් වඩා වැඩි සේවයක් කළාය. එසේ නමුත් සැමියා නිතර මත්පැන් බීමට ඇබ්බැහිව සිටීම නිසා බිරිය සිටියේ දැඩි කේන්තියෙනි. නිතර නිතර සැමියාට අවවාද කළ ද එහි කිසිදු අඩුවක් නොවීය. නිවසට එන විට මත්පැන් බී පැමිණෙනවාට අමතරව නිවෙසට ගෙනවිත් බීමටත් පුරුදු වූ ඔහු බිරිය ලවා බයිට් සාදා ගැනීම ද කළේය.

සැමියාගේ මේ කරදරයෙන් බේරීම සඳහා බිරිය දහ අතේ කල්පනා කර අවසානයේ එක් තීරණයකට එළඹුණාය. ඒ මතට ලොල් සැමියාට මතක හිටින පාඩමක් ඉගැන්වීමය.

ඒ සුපුරුදු පරිදි බීමත්ව නිවසට පැමිණි සැමියා නිවසේදී බීමට ද බෝතලයේ කොටසක් ඉතිරි කරගෙන පැමිණියේය. රාත‍්‍රී කෑමට පෙර ඉතිරි මත්පැන් ද පානය කරන්නට සූදානම් වූ සැමියා සුපුරුදු පරිදි බිරියගෙන් බයිට් සාදා දෙන ලෙස ඉල්ලීය. බිරිය වහාම ක‍්‍රියාත්මක වී කලින් සූදානම් කර ගෙන සිටි අරළු කුඩු මිශ‍්‍ර කර බයිට් දීසියක්ම සාදා දුන්නේය. මත්පැන් බී බයිට් දීසිය ද අහවර කළ සැමියාට තවත් ඉවසා ගත නොහැකි විය. ඒ මොහොතේ පටන් එදින එළි වන තුරු ඔහුට වැසිකිළියේ රැඳී සිටීමට සිදුවිය. බිරියගෙන් බයිට්ස් සාදා ඉල්ලීමට ද එදින පටන් නැවතීමේ තිත තැබිණි.