ගාල්ල නගරාසන්නයේ පදිංචි ඔහු රාජ්‍ය ආයතනයක මාණ්ඩලික නිලධාරියෙකි. පසුගිය දා හදිසියේ අගනුවර සංවිධානය කර තිබූ සම්මන්ත‍්‍රණයකට රියැදුරු සමග උදේ රැයින්ම එහි ගිය ඔහු සම්මන්ත‍්‍රණ ශාලාව ඉදිරිපිට දී වාහනයෙන් බසිත්ම අන්ද මන්ද වූයේ තම දෙපයේ පාට දෙකක සපත්තු දමා ඇති බව දැක ගත් හෙයිනි.

කඩිනමින් සම්මන්ත‍්‍රණශාලාවේ ශ‍්‍රවණාගාරයට ගොස් කවුන්ටර් වේදිකාවේ එහා පැත්තට වී දෙපා නොපෙනෙනා සේ අදාළ කටයුතු සිදු කොට සියල්ලෝම ගිය පසු කඩිනමින් වාහනයට පැන ජාම් බේරා ගත්තත් රියැදුරාගේ උපහාස මුහුණෙන් අනාවරණය වූයේ ඔහු මේ ඇබැද්දිය දුටු බවයි.

ඔහු කිසිදු අවුලක් නැතිව ගෙදර පැමිණ පසුදින නියම ලෙස ඇඳ පැළඳ කාර්යාලයට ගියත් කෑම විවේකයේදී හිතවත්ම නිලධාරිණියක් ”සර් ඊයේ කොළඹ සම්මන්ත‍්‍රණයට හයිබි‍්‍රඞ් (දෙමුහුන්) සපත්තු දෙකක් දාගෙන ගියාලූ නේදැයි කීවාලූ.