(පොල්ගස්ඕවිට එස් වික්‍රමආරච්චි )
සංචරණ සීමා තහනමෙන් රිංගා ඌව පළාතේ සංචාරයක යෙදුණු බස්නාහිර පළාතේ පිරිසක් වනෝද්‍යානයක සතුන් බලමින් විනෝද වෙද්දී ඔවුන් පසුපස අලියකු පැන්නීම නිසා සිදුවූ අලි ජංජාලයක් පිළිබඳව පුවතක් පසුගියදා අසන්නට ලැබිණි.

පළාත් සංචරණ සීමා බලපැවැත්වුවද උපක්‍රමශීලීව පළාත් සීමා පසුකරගත් පිරිස සෆාරි ජීප් රථයක නැඟී වනෝද්‍යානයට ඇතුළු වන විට සැඳෑ කාලය ළංවෙමින් පැවතිණ.

වනෝද්‍යානය තුළ වැවක් අසබඩ ඇති සංචාරක බංගලාවක් කලින් වෙන්කර ගෙන තිබූ බැවින් එහි ගොස් සිත්සේ කා බී විනෝදවී  වැව සිසාරා හමන සිසිල් සුළඟේ පහස විඳිමින් හොඳ නින්දක් ලැබීම සියලු‍ දෙනාගේම බලාපොරොත්තුව විය.

අඳුර වැටීමට තවත් හෝරාවක් පමණ තිබූ බැවින් පිරිස රැගත් ජීප් රිය වනෝද්‍යානය මැදින් සෙමින් සෙමින් ඉදිරියට ඇදුණේ පිරිසට වන සතුන් හොඳින් දැක බලා ගැනීමට අවස්ථාව සලස්වමිණි.

මේ අතර වන ලැහැබක් අතර සිටි අලියෙක් ටිකෙන් ටික වේගය වැඩිකරමින් වාහනය දෙසට දුවන්නට විය.

පිරිස අතර සිටි ළමයින් සහ කාන්තාවන් විලාප නගන්නටත් තවත් සමහරු දෙවියන් යදින්නටත් වූහ.

කෑකෝ ගැසීමත් සමඟ රියැදුරා ද වාහනයේ වේගය වැඩි කළේය.එහෙත් අලියා ද වේගය වැඩිකරමින් ලු‍හුබඳියි.

තැනට සුදුසු නුවණින් කටයුතු කළ රියැදුරා පිරිස නිශ්ශබ්ද කරවා වාහනය හිටිවනම නතර කළේය. ඒ සමඟම අලියාද පැමිණි වේගයෙන්ම වනය ඇතුළට රිංගා ගියේය.

සැනසුම් සුසුමක් හෙළු ෑ පිරිස රැගත් වාහනය නවාතැන් පොළට පැමිණියේය.

    හොඳ නින්දක් ලබන්නට සිහින මවමින් පැමිණි පිරිසෙන් වැඩි දෙනෙකුට අලි භීතිය නිසාම  නිදි වර්ජිතවම රැය පහන් කරන්නට සිදුවුණාලු‍.