අතුරකට රාත‍්‍රියේ නැඟී හොරෙන් පොල් රා බිවු මිතුරන් දෙදෙනකු සිය ඇඳිවතද අහිමි කරගෙන නිවෙසට යාමේ සිද්ධියක් බෙන්තර ගඟ අසබඩ ගම්මානයකින් වාර්තා වේ.

ඉඳහිට අතුරකට නැඟී හොරෙන් රා බීමට හුරු වී සිටි මිතුරන් දෙදෙනා සිය කමිස හා සරොම් ගලවා ගස මුල තබා අතුරේ පොල් ගස් දෙකකට නැඟ ඒවායේ මුට්ටිවල තිබූ රා බීවූහ.

රා බී ආපසු ගස්වලින් බසින විට ඔවුන්ගේ ඇඳුම් අතුරුදන්ව තිබිණි. අවට සොයා බැලූවත් ඇඳුම් සොයාගත නොහැකි වූ නිසා යට ඇඳුම් පිටින්ම ඔවුහු ගෙදර ගියහ.

පසුදින අතුර හිමියාගෙන් ඔවුන්ට පණිවිඩයක් ලැබිණි. එනම් නැති වූ ඇඳුම් අවශ්‍යනම් තම නිවෙසට එන ලෙසය. එහෙත් ඔවුන් තවමත් ඇඳුම් ගෙන ඒමට ගොස් නැත.

පසුව හෙළිවූයේ හොරෙන් රා බොන අය අල්ලා ගැනීමට එදින රෑ පරීක්‍ෂාවෙන් රැක සිටි අතුරේ හිමිකරු හොරෙන් රා බීමට පැමිණි අය හඳුනාගෙනම ඔවුන්ගේ ඇඳුම් රැගෙන ගොස් තිබූ බවයි.

හොරෙන් රා බීවූ දෙදෙනාම අතුර හිමිකරුගේ හිතවතුන් දෙදෙනකු වීම නිසා අතුර හිමිකරු මෙයින් එහාට ඔවුන්ට විරුද්ධව කටයුතු කළේ නැතිලූ.