ශ්‍රී ලංකා නව රජය එහි සියලු වැසියන් එකමුතුකර සමගියෙන් නව ගමනක් ඇරැඹීම ගැන ඉන්දියාව බෙහෙවින් සතුටු වන බවත්, ඒ ගමන සාර්ථක කර ගැනීම සඳහා හැම උදව්වක්ම ලබා දෙන බවත් , දෙමළ ජනයා ඇතුළු සියලු ජාතීන් හට සමගියෙන් සමානාත්මතාවයෙන් ඔවුන්ගේ සිතුම් පැතුම් සාර්ථක කර ගැනීමට හැකිවේවායි ප්‍රාර්ථනය කරන බවත් ඉන්දියා අගමැති නරේන්ද්‍ර මෝදි කොළඹ ජනාධිපති ලේකම් කාර්යාලයයේ දී ප්‍රකාශ කළේය.

ජනාධිපති ලේකම් කාර්යාලය ඉදිරිපිට දී හමුදා ආචාර පෙළපාළියක් පවත්වා ඉන්දියා නායකයා පිළි ගත් අතර ඉන් පසුව ඉන්දියා අගමැති රතු පලස මතින් ගමන් කරමින් මැති ඇමැතිවරුන්   හඳුනා ගත්තේය.

ඉන් පසු ඉන්දියා අගමැති මෝදි සිය දූත පිරිස මෛත්‍රීපාල සිරිසේන ශ්‍රී ලංකා ජනපතිට හදුන්වා දුන්නේය.

ඉන්දියාවේ හිටපු අගමැති රජිව් ගාන්ධිගෙන් පසු ශ්‍රී ලංකාවට පැමිණි ප්‍රථම රාජ්‍ය නායකයා මෝදිය.

‘ශ්‍රී ලංකාවේ  ප්‍රගතිය සංහිඳියාව හා සාමය වෙනුවෙන් යන අලුත් ගමනට අපේ සුභ පැතුම් අවංක සහාය පළ කරන්නෙමු.

එක්සත් ශ්‍රී ලංකාවක ශ්‍රී ලාංකික දෙමළ ප්‍රජාව ඇතුළු ශ්‍රී ලංකාවේ සියළු ජන කොටස්හි බලාපොරොත්තු සඵල කරමින් , සියළු දෙනාටම සමාන  ජීවන තත්ත්වයක්ද, සාධාරණය ද, සාමය ද ,ගරුත්වය ද ඇතිව අනාගතය ගොඩ නැඟිමට ශ්‍රී ලංකා රජය ගන්නා උත්සාහයේදී අපිද පසු පසින් සිටින්නෙමු.

ශ්‍රී ලංකා ආණුඩක්‍රම ව්‍යවස්ථාවේ 13 වැනි සංශෝධනය පුර්ණ ලෙස ඉක්මනින් ක්‍රියාත්මක කරමින් 13 වැනි ආණ්ඩුක්‍රම ව්‍යවස්ථාව ද ඉක්මවා යාමට දායක විමෙන් මෙම ක්‍රියාවලිය සාර්ථක කරගත හැකි බව අප විශ්වාස කරන්නෙමු.‘

‘ශ්‍රී ලංකාව අපේ සමීපතම මිතුරෙකි. බුදු දහමේ ආභාෂය අප දෙරටටම හිමි වී තිබේ. ත්‍රිකුණාමලය මෙම කලාපයේ ඉන්ධන කේන්ද්‍රය බවට පත් කිරීමට ඉන්දියාව කැමතියි. ශ්‍රී ලංකාවේ දුම්රි මාර්ග සංවර්ධනයට ඇමෙරිකා ඩොලර්  තිස් අට කෝටියක ණය ආධාර සැපයීමට ද ඉන්දියාව බලාපොරොත්තු වේ.‘

ශ්‍රී ලංකා ජනපති මෛත්‍රීපාල සිරිසේන මහතා මුලින්ම කතා කරමින් පැවසුවේ බුද්ධ ධර්මයෙන් හා හින්දු ධර්මයෙන් දෙරටම බැඳී සිටින බවයි.

‘දෙරටම   සමීප සහයෝගතාවය ඔස්සේ ආර්ථික සංස්කෘතික හා සෙසු අංශවල දියුණුව වර්ධනය කර ගැනීමට හැකි හැම පියවරක්ම ගන්නවා.‘