බණ්ඩාරනායක මහතා සසහ ඩී.ඒ.රාජපක්ෂ මහතා එජාපයේ කෙනෙහිලිකම් නිසා එදා එළියට බැහැලා හැදූ ශ්‍රීලනිපය අද අලියාට තුරුළුවී සිටීම ගැන කනගාටුවන බව හිටපු ජනපති මහින්ද රාජපක්ෂ මහතා අද කිරුළපන පැවැති ඒකාබද්ධ විපක්ෂයේ මැයි දින රැලියට එක්වෙමින් පැවසීය.

රාජපක්ෂ මහතා සිය කථාවේ මෙසේද සඳහන් කළේය.

‘සහෝදරවරුනි මම පහුගිය දවස් ටිකේ ලස්සන කථා අහ අහා හිටියා. මට ඇහෙනවා එක නාලිකාවක කියනවා තාම මහින්ද රාජපක්ෂ මහතා විපක්ෂයේ රැස්වීමට ඇවිල්ලා නෑ කියලා. ටෙලිපෝන් කෝල් කිහිපයක්ම ආවා තාම නිදිද යන්නේ නැද්ද කියලා. ඒ මෙහෙ අය නෙවෙයි. දුර පළාත්වල අය. ඉතින් මම දඩිබිඩි ගාලා ආවා. ආවම අපේ මන්ත්‍රීවරු කියනවා මට මුලින් කථා කරන්නලු. මම කිව්වා කථා කරලා ඉවරවෙනකම් මම මෙතැනින් හෙල්ලෙන්නේ නෑ කියලා. මේ දවස්වල ශ්‍රී ලංකා නිදහස් පක්ෂය නියෝජනය කරමින් තමයි මම මේ වේදිකාවට ආවේ කියන එක මතක් කරන්න ඕන.

ඒකාබද්ධ විපක්ෂයේ ශ්‍රී ලංකා නිදහස් පක්ෂය වෙනුවෙන් මම මෙතැනට ආවා. අපේ පක්ෂේ රැස්වීමක් ගාල්ලෙත් තියෙනවා. අපේ නෙවෙයිද? නෑ නෑ ඒ ගිය අය මට සමහරු කිව්වා අපි සර් එතැනට ගිහින් එන්නම් කියලා. එහෙ වැහැලා හේදිලා ගිය හින්දා අපි හදලා දීපු හයිවේ එකේ විනාඩි 45 න් මෙතැන. මෙතැනින් තමයි එන්න බැරිවෙන්නේ. පාර හිරවෙලා. අපේ ප්‍රධාන හතුරා මේ ආණ්ඩුව. බණ්ඩාරනායක මහතා එජාපයෙන් අස්වුණේ ඩී.ඒ.රාජපක්ෂ මහතා සමග එදා එජාපයෙන් කළ කෙනෙහිලිකම් නිසා. ජනතාවට සඟ, වෙද, ගුරු, ගොවි, කම්කරු සියලු දෙනාට කළ කෙනෙහිලිකම් නිසා. මට කනගාටු එදා බණ්ඩාරනායක මහතා හදපු ශ්‍රීලනිපය අද අලියාගේ තුරුළට තුරුළු වෙච්චි එක ගැනයි. මොන ජාතික ආණ්ඩුවක්ද? රනිල් වික්‍රමසිංහ මහත්තයා කියලා තියෙනවා මට නඩු දානවා කියලා. යුද්දෙ හරියට කළේ නෑ කියලා නඩු දානවලු. බෙදිච්ච කැඩිච්ච රටක් අපි එක්සේසත් කළා. ඒක ආපහු කඩන්න ඉඩදෙනවද කියලා තමුන්නාන්සේලා තීරණය කරන්න. මගේ කැබිනට්ටුව ලොකුයි කිව්වා. ඒකට කන්න දෙන්න බැරි නිසාලු මේක කළේ. හෙට ඉඳලා වැට් බද්ද එනවා දන්නවද? මේ බදු වැඩි කරන්නේ ඇයි මට තේරුමක් නෑ. මම ගණන් හදලා බැලුවා. ලෝකයේ දැන් බොරතෙල් බැරලයක මිල 60%කින් අඩුවෙලා. කිරිපිටි 60%කින් අඩුවෙලා. සීනි 20%කින් අඩුවෙලා. යූරියා පොහොර 40%කින් අඩුවෙලා. හැබැයි ලංකාවේ බඩුමිල අඩුවෙන්නේ නෑ. වැඩිවෙනවා. 2015 අපේ මුදල් ඇමැති ගෙනාවා අයවැයක්. ඒක අයවැයක් නෙමෙයි ණය වැයක්. ලයිට් බිල වැඩිවෙනවා. තමුන්නාන්සේලා තෙමෙනවානම් මමත් තෙමෙන්නම්. මට කුඩ ඕනෑ නෑ. මට ගොඩත් එකයි මඩත් එකයි. මම බලයේ හිටියා අවුරුදු නවයක්. මම විදේශ ණය අරන් තියෙන්නේ ඩොලර් බිලියන 12යි. ඒකෙන් 4ක් යුද්ධයට වියදම් කළා. අනෙක් අටෙන් තමයි රටේ පේන්න තියෙන සංවර්ධනය කළේ. ඔය කියන වරාය ඔය කියන ගුවන්තොටුපළ දැන් වී ගබඩාව මේවා ඔක්කොටම ගියේ දොළහයි. විද්‍යාගාර තවම විවෘත කරගන්න බැහැ. මේ ආණ්ඩුව අද වෙනකොට බිලියන 7.4ක් අරන්. හයිඩ් පාර්ක් එකේ ඵෛතිහාසික  රැලිය වෙනකොට තිබුණේ 6යි ගාණක්. මේ මාස දෙක තුනට බිලියනයක් වැඩිවුණේ කොහොමද ? කරපු කෙන්ගෙඩියක් තියෙනවාද? මේ යූඇන්පී ආණ්ඩුවෙන් තමයි ණය අරන් තියෙන්නේ. හැබැයි එතුමා කියනවා ශ්‍රීලංකන් එකෙන් විතරක් කෝටි 320ක් පාඩුයිලු. අද මේ සෙනග ආවට පස්සේ මේ කථාව කළාට පස්සේ අපේ හිතවතුන්ට නඩු වැටෙනවා. කෝ ඉන්නවද ඔක්කොම බලාගෙන ඉන්න. මම නාමල්ට කියලා තියෙන්නේ උඹ බලාගෙන හිටපන් යන්න වෙනවා. බැසිල්ට ගෝඨාට යන්න වෙනවා. ඊළඟට මටත් යන්න වේවි. විමල් ඇමැතිතුමා ලෑස්ති වෙන්න. අපිට එකට යන්න පුළුවන්. හැබැයි මම කියනවා අපි හිරගෙවල් දාහක දැම්මත් මේ රටේ ජනතාව වෙනුවෙන් මේ එකමුතුව කඩන්න දෙන්නේ නෑ. මේක ඉදිරියට ගෙනියනවා. අද සමහරු බොරු ප්‍රචාර ගෙනියනවා අපි කුමන්ත්‍රණය කරනවාලු. ඩීල් ගහනවාලු. අවුරුදු 40 ගාණක් යූඇන්පී විරෝධී රැලියේ හිටපු මට මේක කිව්වම මට පුදුමයි.අපේ කියලා කියා ගන්න අය කියන්නේ. කවුරුවත් අපි ඩීල් ගහන්න සූදානමක් නෑ. මේ සන්ධානය කඩන්න සූදානමකුත් නෑ. මේ ආණ්ඩුවට විරුද්ධවට කරන ව්‍යාපාරය අපි දිගටම කරන එක නවතින්නේ නෑ කියන එක මතක් කරමින් මේ රටේ ජනතාව කොතැනද මහින්ද රාජපක්ෂ ඇතුළු අපි සියලු දෙනා එතැන ඉන්නවා කියන එක මතක් කරනවා. මේ රටේ ජනාධිපති මන්දිරේ ඉඳන් හැම ආයතනයක අස් කරපු මිනිස්සු වෙනුවෙන් කම්කරුවන් වෙනුවෙන් අපි පෙනී සිටිනවා කැප වෙනවා‘

4adb38a6e3c02b7616a342ed7c9924c97aa1764b93ef8f7538563ecd6b449df8_full 8d81d266060553438ae550170daa53251316d8df9b810ecd9ae19b1a4adc54dd_full 82f8eeb9f892e26e76d4ae8b6dde68c688b2d2dbd7cca1f3ff88e0e26608b5b3_full