මීට වසරකට පෙර දෙසැම්බර් මාසයේ රටක් හඳුනන තරුවක් බවට පත් වුණ ජනිත් අද වනවිට ලොවක් හඳුනන ගායකයෙක් බවට පත් වී හමාරයි. පසුගිය දවසක ජනිත් අලූත් ගීතයකුත් එළිදැක්වුව ගමන් හිමාල කන්ද තරණය කරලා ලොකු අත්දැකීම් ගොන්නකුත් එක්ක මව්බිමට ආවා. මේ සිදුවීම් එක්ක අපි ඔහුව මෙවර කතාබහට එකතු කරගන්න හිතුවා. මේ ජනිත් ඉද්දමල්ගොඩ.

ඉතින් කොහොමද ජනිත්?

සුපුරුදු විදියට වැඩ කටයුතු ටික කරගෙන ඉන්නවා. මගේ අලූත් ගීතයක් එළි දැක්වූවා. හිමාල කන්ද තරණය කරලා ආවා. මේ දවස්වල සංගීත ප‍්‍රසංගවලට සහභාගි වෙනවා.

ඞී‍්‍රම් ස්ටාර් වුණාට පස්සේ කාලයක්ම නිහඬ වෙලා හිටියේ ඇයි?

ඞී‍්‍රම් ස්ටාර්වලින් පස්සේ ගීතයක් කළා. ඞී‍්‍රම් ස්ටාර්වලට අවුරුද්දක්ම කැප කරපු නිසා ඞී‍්‍රම් ස්ටාර් ඉවර වුණ ගමන් අධ්‍යාපන වැඩවලට මුළු කාලයම යොදවන්න සිද්ධ වුණා. මොකද උසස් පෙළ කියන්නේ මගේ හීනයේ මූලාරම්භයනේ.

හීනයේ මූලාරම්භය කිව්වේ?

සංගීත අංශයෙන් විශ්වවිද්‍යාල කථිකාචාර්යවරයෙක් වෙන එක තමයි මගේ ලොකුම හීනය. එතනට යන්න උසස් පෙළ කඩුල්ල ඉහළින්ම පනින්න ඕනනේ. ඒ නිසා පසුගිය දවස්වල විභාග වැඩ නිසා කලා වැඩවලින් මාස ගණනක්ම ඈත් වෙලා තමයි හිටියේ.

අලූත් ගීතය ගැන කතාකරන්න කලින් කඳු තරණය ගැන කතා කරමුකෝ... මොකද එකපාරටම කඳු නගින්න හිතුණේ?

ඒක චූටි කාලේ ඉඳලම මගේ හිතේ තිබුණ හීනයක්. කඳු නැගීමේ හීනේ නම් සැබෑ කරගත්තා. මම අධ්‍යාපනය ලබපු නාලන්දා විද්‍යාලයේ ත‍්‍රාසජනක සංගමය තමයි මේ කටයුත්තට පූර්ණ දායකත්වය දුන්නේ. මම පාසලේ නවය වසරේ ඉඳලම හිමාල කන්ද තරණය කරන්න පාසලෙන් අවසර ගන්න උත්සාහ ගත්තා. ඒත් අවස්ථාවක් ලැබුණේ නැහැ. කවදාහරි හිමාල කන්ද තරණය කරන්න අවස්ථාව ලැබේවි කියලා විශ්වාසයක් තිබුණා. කඳු නගින්නන්ගේ කණ්ඩායමේ නායකයා විදියට කටයුතු කළෙත් මම. මාස එකහමාකරක පාඨමාලාවක් එක්ක තමයි කන්ද තරණය කළේ. ත‍්‍රාසජනක සිදුවීම් ගොඩක් වුණා. කොහොම වුණත් හිමාලය තරණය කරන්න ලැබීම මම ජීවිතේ ලබපු ලොකුම ජයග‍්‍රහණයක්. ඒ වගේම හොඳ අත්දැකීමක්. ගමන දුෂ්කර, කටුක වුණත් අවස්ථාව උදා කර ගන්න ලැබීම ගැන ගොඩක් සතුටුයි.

කොච්චර උසකට ළඟා වුණා ද?

අඩි 17,000ක තරම් උසට තරණය කළා.

ඉතින් අලූත් ගීතය ගැනත් කියමු?

”අන්සතු වුණත්” ගීතය තමයි මගේ අලූත්ම ගීතය. මේ මගේ දෙවැනි ගීතය වගේම පළමු විෂුවල් එක කරපු සින්දුව. ගීතය ලිව්වේ යසිත් දුල්ෂාන්. සංගීතය විකුම් පියුමාල්ගෙන්. මේ ගීතයත් විරහ ගීතයක්.

ඒ කියන්නේ ජනිතුත් අඬන රැල්ලේ ගායකයෙක් වෙන්න ද හදන්නේ?

කවුරු කොච්චර දේවල් කිව්වත්, දෝෂාරෝපණය කළත් හැමෝම ගීත කරන්නේ රැුල්ලට තමයි. මේකත් ඇත්තටම රැුල්ලේ ගීතයක්. මම මල් සින්දු කියන්නේ නැහැ කියලා කියන්නෙ නැහැ. බලාපොරොත්තුවක් තියෙනවා ඉදිරියේදී වෙනස්ම ආරේ ගීතයක් කරන්න. අපිට මේ රැුල්ලත් එක්ක එකපාරටම වෙනස් වෙන්න අමාරුයි. අලූත් ගීත නිර්මාණ කරන්න කැමතියි. ආසයි. ඒත් රැුල්ලේ ගීත නොකීවොත් අපිට පේ‍්‍රක්ෂකයා අතරට යන්න අමාරුයි. මගේ ඊළඟ ගීතයත් රැුල්ලේ ගීතයක්ම තමයි. අපේ මහන්සිය එක්ක තමයි අපේ ගමන තියෙන්නේ..

සංගීතය පිළිබඳ වැඩිදුර අධ්‍යාපනයට ඉන්දියාවට යන්න තිබුණ බලාපොරොත්තුව දැන් ජනිත්ගෙන් නැති වෙලා ද?

ඇත්තටම දැන් නම් ඉන්දියාවට යන්න අදහසක් නැහැ. මම කාලයක්ම කලාවෙන් ඈත් වෙලා ඉඳපු නිසා දැන් ආයෙමත් ලංකාවෙන් ගියොත් පේ‍්‍රක්ෂකයාට මාව අමතක වෙලා යයි. පේ‍්‍රක්ෂකයාගෙන් ඈත් වෙන්න මම කැමති නෑ. ලංකාවේ ඉඳගෙන අධ්‍යාපනය පැත්තෙන් මගේ අරමුණට යනවා. නම හැදුනා වගේම පවත්වාගෙන යන්නත් අද කලාව ඇතුලේ ලොකු සටනක් කරන්න වෙලා තියෙනවා. ඒ නිසා ඉන්දියාවට යන්න බලාපොරොත්තුව දැනට නම් නැහැ.

ජනිත්ට රියැලිටි වැඩසටහන්වලින් ආරාධනා ලැබුණේ නැද්ද?

ආරාධනා නම් ලැබුණා. අධ්‍යාපන වැඩයි, ඉන්දියාවෙයි ගිය නිසා ඒ අවස්ථා මට මඟ ඇරුණා. ඉදිරියේදී නැවත ආරාධනා ලැබුණොත් බාරගන්නවා.

සින්දු කියනවා, කඳු නගිනවා, රඟ පාන්න අදහසක් නැද්ද?

සින්දු කියන්න හැකියාව තිබුණට රඟපාන්න නම් මට හැකියාව නැහැ. මට රඟපාන්න ආරාධනාවක් ලැබේවි කියලා හිතන්නෙත් නැහැ. පුංචි ආසාවක් තියෙනවා. මගේ මියුසික් වීඩියෝ එකක හරි රඟපෑම අත්හදා බලනවා.

මොනවද මේ දවස්වල අලූත්ම වැඩ?

ගීත කිහිපයක් නිර්මාණය කරනවා. ඊට අමතරව බෞද්ධ චිත‍්‍රපටයක පසුබිම් ගීතයකට ආරාධනා ලැබිලා තියෙනවා. සුපුරුදු විදියට ප‍්‍රසංගවලටත් දායක වෙනවා. විභාගෙත් ඉතින් ඉවර වුණා. සෞන්දර්ය විශ්වවිද්‍යාලයට යන්න බලාපොරොත්තුවෙන් ඉන්නවා. කොහොම වේවි ද දන්නේ නැහැ. බලමු ඉදිරියේදී.

එතකොට සංගීත කණ්ඩායමේ වැඩ?

ඒවත් සුපුරුදු විදියට කරගෙන යනවා.

ජනිත් දැන් පෙම්වතෙක් කියලත් ආරංචියි?

ඒක ගැන පස්සේ කියන්නම්. ඒවා කියන්න තව කල් තියෙනවා. පුවත්පතකට මම ආදරේ ගැන කියලා පොඩි පොඩි ප‍්‍රශ්න වගයක් ආවා. තාම අපි ඉගෙන ගන්නවනේ. කිවයුතු කාලෙදී කියන්නම්.

නදීෂා අතුකෝරළ / ඡායාරූපය සඳුන් ගමගේ