තමන් ප‍්‍රගතිශීලි යැයි නිතරම කියා ගත් ශ්‍රී ලංකා නිදහස් පක්ෂය මහින්ද රාජපක්ෂ පාලන සමයේ දැඩි අන්තගාමී තත්ත්වයට පත්ව බොරු වමත් ,බොරු දකුණත් වෙනුවෙන් ඉකුත් කාලය පුරා පෙනී සිටියදී ධනපති යැයි හංවඩු ගැසූ එක්සත් ජාතික පක්ෂය ප‍්‍රමුඛ යහපාලන රජය නිදහස් මතධාරීන් ලෙස හිඳිමින්  කම්කරු අයිතිය වෙනුවෙන් හැමවිටම පෙනී සිටිනවා යැයි සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා අද(1) කොළඹදී පැවති මැයි දින රැස්වීමකදී පැවසීය.

ශ්‍රී ලංකා ජනරජ සෞඛ්‍ය සේවා සංගමයේ මැයි දින රැස්වීම මරදාන ,පන්සල පාරේ සංගම් ප‍්‍රධාන කාර්යාලයේදී අමතමින් ඔහු එසේ කීවේය.

‘දහනව වැනි ශතවර්ශයේ මෙන් මෙරට කම්කරු ව්‍යාපාර මෙහෙයවන මෝඩ වාමාංශික නායකයින් අදත් සිටිනවා. නමුත් වෙනස්වන ලෝකයේ පැරණි සමාජවාදයේ පරමාර්ථ  රැගෙන නවීනත්වයට ගැලපෙන පරිදි මේ රටේ කම්කරු ජනතාවගේ ප‍්‍රශ්න විසඳාගත යුතු කාලය එළැඹිලා. ලොව බොහෝ රටවල කම්කරු ජනතාව උණ්ඩයෙන් තමන්ගේ කම්කරු අයිතින් දිනා ගන්නකොට අපේ රටේ කම්කරු ජනතාව ඉකුත් වසරේ ජනවාරි 08 වැනිදා පැවති ඡන්දයෙන්  සියලූම අයිතීන් දිනාගත්තා‘ යැයිද  සෞඛ්‍ය අමාත්‍යවරයා කියා සිටියේය.

රජයේ විගණනය සොයා බැලෙන විගණන පනතට අමාත්‍ය මණ්ඩල අනුමැතිය සඳහා ලබන බදාදා (04) ඉදිරිපත් කරන බව සෞඛ්‍ය අමාත්‍ය දොස්තර රාජිත සේනාරත්න පැවසීය.

විගණන පනත යහපාලන රජයේ එක් පෙරොන්දුවක් බවත් ඔහු කීවේය.