ස්වභාවික පරිසරයේ යම් කිසි වෙනසක් හෝ අසාමන්‍ය තත්ත්වයක් උදා වී ඇත්නම් වහාම එම ප්‍රදේශවලින් ඉවත්වන්නැයිද, කඳුකරයේ සිටින ජනතාවටත් අවශ්‍ය උපදෙස් මේ වනවිටත් ලබා දී ඇතැයි ආපදා කළමනාකරණ අමාත්‍ය අනුර ප්‍රියදර්ශන යාපා මහතා අද (19) විදේශ අමාත්‍යංශයේ පැවැති මාධ්‍ය හමුවකදී පැවැසීය.

“ආපදාවන්ට පත්වූන්ට අප දැනටමත් ආහාර හා අනෙකුත් දෑ ලබා දී තිබෙනවා. එය අපි දිගටම ක්‍රියාත්මක කර සිටිනවා. ඒ වගේම ඇඳුම් අපි අපේ අරමුදල්වලින් ලබාගන්නවා. පානීය ජලය, ඖෂධ, පවිත්‍රකාරක, සනීපාරක්ෂක දෑ වඩාත් අවශ්‍ය වෙනවා. අපි හැකියාවක් තිබෙන අයගෙන් දානපතියන්ගේ ඉල්ලා සිටිනවා ඒ කෙරෙහි වැඩි අවධානයක් යොමු කරන ලෙස. අපට දැනට කිසි දෙයක් නිශ්චිතව කියන්න බැහැ. බොහෝ ප්‍රදේශ ජලයෙන් යටවී තිබෙනවා. දැනටමත් මුදා ගැනීමේ කටයුතු ක්‍රියාත්මක වෙනවා. ඒවා ඉදිරි දින කිහිපයේදී ක්‍රියාත්මක වෙනවා. අපටත් දළ අදහසක් කියන්න වෙන්නේ, ජලය බැස ගියාට පසුවයි. දැනටත් ගංඟාවල ජල මට්ටම් ඉහළ යනවා. බොහෝ පිරිස්වලට අප දන්වා සිටියත් ඔවුන් නිවාසවලින් ඉවත් වුණේ නැහැ. එය එක් අතකට සාධාරණයි. ඔවුන්ගේ සියල්ල තිබෙන්නේ නිවාසවල. එහෙත් දැන් පිරිස් ආපදා මධ්‍යස්ථානවලට පැමිණෙමින් සිටිනවා.‘ යැයි අමාත්‍යවරයා කීය. 

‘අරණායක තත්ත්තවය ඉතා දරුණුයි. මෙය අපට ඉතිහාසයේ මෙතෙක් වාර්තා වූ දරුණුම තත්ත්වයයි. එම ප්‍රදේශයේ මුදාගැනීම් කටයුතු දිගින් දිගටම ක්‍රියාත්මක වෙනවා. දළ වශයෙන් සියයකට වැඩි ප්‍රමාණයක් තිබෙන්නට ඇතැයි විශ්වාස කරනවා. බොහෝ අමාරුවෙන් අරණායක ඇතුළු ප්‍රදේශවල මුදාගැනීම් කටයුතු සිදු කරනවා‘ යැයි ද ඇමැතිවරයා සඳහන් කළේය. 

පවත්නා ආපදා තත්ත්වය යටතේ සෞඛ්‍ය අමාත්‍යාංශයෙන් ලබාගත යුතු ඕනෑම තොරතුරක් හෝ අවශ්‍යතාවක් හෝ 011 307 1037 අංකයෙන් ලබාගත හැකි බව සෞඛ්‍ය පෝෂණ හා දේශීය වෛද්‍ය අමාත්‍ය වෛද්‍ය රාජිත සේනාරත්න මහතා එහිදී පැවසීය.

“සියලුම ආපදා මධ්‍යස්ථානවලට අප දැනටමත් අධිකරණ වෛද්‍යවරුන්, හෙද කණ්ඩායම්, වෛද්‍යවරුන් ඇතුළු කණ්ඩායම් පිටත් කර යවා තිබෙනවා. රෝහල්වලට විශේෂ කණ්ඩායම්, හදිසි සේවා කණ්ඩායම් හා ගිලන් රථ යවා තිබෙනවා.

ඒ වගේම රෝහල්වලට පැතිරෙන රෝග සබන්ධයෙන් ගත යුතු ක්‍රියාමාර්ග සම්බන්ධයෙන් මාර්ගෝපදේශ ලබා දී තිබෙනවා. ක්ලෝරීන් පෙති, සනීපාරක්ෂක පහසුකම් ආදිය සපයා දී තිබෙනවා. අපි සෑම ආපදා මධ්‍යස්ථානයකට මහජන සෞඛ්‍ය පරීක්ෂකවරුන්, සෞඛ්‍ය වෛද්‍ය නිලධාරීන් හා වින්නඹු මවුවරුන් පිටත් කර තිබෙනවා‘ යැයිද සේනාරත්න මහතා කීවේය.