(හර්ෂණ තුෂාර සිල්වා)

ඕනෑම ආණ්ඩුක්‍රම ව්‍යවස්ථා කරුණක් සම්බන්ධයෙන් විමසා බැලීමට අමාත්‍ය මණ්ඩල අනුකමිටුවක් පත්කළ බව බලශක්ති අමාත්‍ය කැබිනට් සම ප්‍රකාශක උදය ගම්මන්පිල මහතා අද (19) ප්‍රකාශ කළේය.

ආණ්ඩුක්‍රම ව්‍යවස්ථා සංශෝධන, ආණ්ඩුක්‍රම ව්‍යවස්ථාවට සම්බන්ධ ඕනෑම ලියවිල්ලක් හෝ ඕනෑම කරුණක් සම්බන්ධයෙන් විමසා බැලීමට එම කැබිනට් මණ්ඩල අනුකමිටුව පත්කළ බවද හෙතෙම කීය.

නව ආණ්ඩුවේ පළමු කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍ය උදය ගම්මන්පිල මහතා ඒ බව කීවේය.

අධ්‍යාපන අමාත්‍ය මහාචාර්ය ජී.එල්. පීරිස්, විදේශ සබඳතා අමාත්‍ය දිනේෂ් ගුණවර්ධන, කම්කරු අමාත්‍ය නිමල් සිරිපාල ද සිල්වා, අධිකරණ අමාත්‍ය ජනාධිපති නීතිඥ අලි සබ්‍රි සහ බලශක්ති අමාත්‍ය උදය ගම්මන්පිල යන මහත්වරු එම කමිටුවේ සාමාජිකයෝ වෙති.

ආණ්ඩුක්‍රම ව්‍යවස්ථා සංශෝධනය පිළිබඳ අමාත්‍ය මණ්ඩල පත්‍රිකා අමාත්‍ය මණ්ඩල සටහන් හා කෙටුම්පත් යනාදීය අධ්‍යයනය කිරීම සඳහා මෙම අමාත්‍ය මණ්ඩල අනුකමිටුව පත්කළ බවද ගම්මන්පිල මහතා කීවේය.

ආණ්ඩුක්‍රම ව්‍යවස්ථා සම්බන්ධ ඕනෑම වාර්තාවක් කෙටුම්පතක් හෝ වෙනත් ඕනෑම යමක් කැබිනට් මණ්ඩලයට ඉදිරිපත් කෙරෙන්නේ මෙම කමිටුවේ නිරීක්ෂණ සහිතව යැයි ද ඔහු කීවේය.

නව ආණ්ඩුක්‍රම ව්‍යවස්ථාවක් සම්පාදනය කිරීම සඳහා විද්වත් කමිටුවක් පත්කිරීම වෙනුවෙන් ඊට අදාළ නම් යෝජනා කිරීම සඳහා අධිකරණ අමාත්‍යවරයාට බලය දුන් බව ඔහු කීය.

ඒ අනුව නව ආණ්ඩුක්‍රම ව්‍යවස්ථාවක් සම්පාදනය කරන විද්වත් කමිටුවේ නම් ඉදිරියේදී අමාත්‍ය මණ්ඩලයට ඉදිරිපත් කෙරෙන බවද හෙතෙම කීවේය.

දහනව වැනි ආණ්ඩුක්‍රම ව්‍යවස්ථා සංශෝධනය ගෙනඒමේදී තොරතුරු දැනගැනීමේ අයිතිවාසිකම ආදී සාධනීය ලක්ෂණ රැකගැනීමටත් ජනාධිපති ධුර කාලය වසර පහක් දක්වා සීමාකිරීම සහ ජනාධිපතිවරයාට ධුරය හැකි වාර ගණන දෙකක් ලෙස පවත්වා ගැනීමටත් අමාත්‍ය මණ්ඩලයේදී තීරණය කළ බවද ඔහු කීය.

20 වැනි ආණ්ඩුක්‍රම ව්‍යවස්ථා සංශෝධනය කෙටුම්පත් කර අමාත්‍ය මණ්ඩලයට ඉදිරිපත් කිරීමට අවශ්‍ය පූර්ණ බලතල ද අමාත්‍ය මණ්ඩල රැස්වීමේදී අධිකරණ අමාත්‍යවරයාට ලබාදුන් බවද හෙතෙම කීවේය.

කැබිනට් ප්‍රකාශක ජනමාධය අමාත්‍ය කෙහෙළිය රඹුක්වැල්ල සහ රජයේ ප්‍රවෘත්ති අධ්‍යක්ෂ ජනරාල් නාලක කලුවාව යන මහත්වරු ද එක්ව සිටියහ.