ප්‍රියන්ත කොළඹගේ සිනමාවේදියාගේ අලුත්ම චිත්‍රපටය "ආදරණීය කතාවක්" අති සාර්ථකව තිරගත වෙනවා. ඇත්තෙන්ම සිනමා ශාලාවලට සෙනඟ ඇදගන්න පුළුවන් චිත්‍රපට හැදුවා නම් අපේ ප්‍රේක්ෂකයින්ගේ අඩුවක් වෙන්නෙ නැහැ.

ඔන්න මේ චිත්‍රපටයේ මංගල දර්ශනය තිබුණෙ රීගල් සිනමාහලේ. තරු වැහි වැහැලා හිටිය රාත්‍රියක්. ලංකාවෙ ජනප්‍රියතම කලාකරුවන් රැසක් මංගල දර්ශනයට සහභාගි වෙලා හිටියා. ඒත් හිනාවෙවී චිත්‍රපටය බලන්න ආපු කට්ටියට අන්තිමට වුණේ මොකක්ද? බොහෝ දෙනෙක් චිත්‍රපටය ඉවරවෙලත් තම තමන්ගෙ පුටුවලින් නැඟිටින්නෙ නැහැ. ඒ තරමට අඬලා. ලේන්සුවලින්, ටිසූ වලින් කඳුළු පිහදාලා තමයි එක එක්කෙනා එළියට ආවෙ.

ගෑනු පිරිමි භේදයක් නැතුව හැමෝම ඇඬුවා. ප්‍රධාන චරිතය රඟපාන හේමාල් රණසිංහ චිත්‍රපටය බැලුවෙ තුන්වැනි පාරට. ඒත් ඔහුටත් කඳුළු හංඟගන්න බැරිවුණා. මංගල දර්ශනය ඉවරවෙලා එළියට ආපු හැමෝම වගේම ප්‍රියන්ත කොළඹගේට සහ චමින්ද ගමගේට සුභ පතන ගමන් කිව්වෙ "ඇඬෙන්න වැඩේ දුන්නා නේද?" කියලා.

ඔන්න අපේ ජනප්‍රිය නිළි සේමිණි ඉද්දමල්ගොඩ චිත්‍රපටය බලලා තියෙන්නෙ ප්‍රධාන නිළි භූමිකාව රඟපාන උදාරි වර්ණකුලසූරිය ළඟ ඉඳලා. අන්තිම හරියෙදි සේමිණීගේ ඇස්වලින් කඳුළු පනින්න ඔන්න මෙන්නලු. ඒත් අමාරුවෙන් තද කරගෙන ඉඳලා තියෙනවා. ඒත් එක පාරටම හෝ ගාලා සේමිණී හයියෙන් අඬන්න පටන් ගත්තම ළඟ හිටිය උදාරි හොඳටම බය වුණාලු.

තමන්ගේ පුතාලා නැතිවුණාට පස්සෙ පළවෙනි වතාවට චිත්‍රපටයක් බලපු ප්‍රවීණ ගායන ශිල්පිනී සුජාතා අත්තනායකත් හොදටම ඇඬුවලු. බොහෝ දෙනෙක් කියන්නෙ මේක හරියට ඉතාම සංවේදී බොලිවුඩ් චිත්‍රපටයක් බැලුවා වගේලු. ඔන්න ඔය අතර චිත්‍රපටය බලන්න ආව ගාමිණී සුසිරිවර්ධන ජනප්‍රිය ගායකයා. මතකයිනෙ සිරස සුපර් ස්ටාර් වැඩසටහනේ හිටපු වැඩ්ඩා. "ලස්සනට පිපුණ වනමල්" මතකයිනෙ. එයා ඇවිත් හිටියෙ එයාගෙ නෝනයි, පුතයි, අම්මයි එක්ක. ඔන්න චිත්‍රපටයේ අවසාන හරියෙ හැමෝම අඬද්දි හොඳටම හිනාවෙවී  හිටිය එකම එක්කෙනා ගාමිණී සුසිරිවර්ධනලු. "අපේ අම්මා මළාට අඬන කෙනෙක් නෙවෙයි. එයා අඬනවා අපි කවදාවත් දැකලා නැහැ. ෆිල්ම් එක බලලා එයා අඬනවා දැක්කම මට "බකස්" ගාලා හිනා ගියානෙ මචං." ගාමිණී කිව්වා.