යෂාන් ද සිල්වා නිෂ්පාදනය කළ ආලොක් අකලංකගේ කුලුඳුල් ගීතය වන "මනමාලයි හිත" ගීතය මේ දිනවල අන්තර්ජාලයේ ප්‍රතිචාර ලබමින් සිටී. අපි ඒ පිළිබඳව විමසීමට හා යශාන් සම්බන්ධ කර ගතිමු.

ආලෝක් අකලංක

"මනමාලයි හිත" ගීතයේ තමයි මගේ මුල්ම ගීතය. මෙම ගීතය නිෂ්පාදනය කළේ යෂාන් ද සිල්වා විසිනුයි. සංජුල හිමාල් සංගීතවත් කර යූ ප්‍රගීත් පද රචනයෙන් දායක වී තමයි මේ ගීතය නිර්මාණය කළේ. මම ආලෝක් අකලංක. ආලෝක් කියන සංකල්පයෙන් තමයි මුල්වරට ඉදිරියට එන්නෙ. විරහවම නැතුව අලුත් ආකාරයට ආදරය කරද්දි එන ගැටලු හිතට දැනෙන දේවල් එක්ක වෙනත් පැත්තක් කතා කිරීම තමයි අපේ සංකල්පය වුණේ. මෙහි වීඩියෝව සොබාදහමත් සමග මුසුවෙන, ආදරේ හැඟීම් දැනෙන විදියට තමයි වාද්දුවේ වෙරළ තීරයේදී රූගත කිරීම් කළේ. රත්මලානේදීත් රූගත කිරීම් කිහිපයක් සිදුකළා. එකම ආරකට නොගිහින් වෙනස් හැඩතලකට යායුතු ආකාරයෙන් තමයි ආදරයේ හැඟීම වෙනස් ආකාරයෙන් රූගත කළේ. ආලෝක් යන නම මුලින්ම මාධ්‍යයට හඳුන්වා දෙන්නෙ යශාන් අයියා. ඔහු තමයි මට මේ ක්ෂේත්‍රයට එන්න පාර කියා දුන්නෙ. අන්තර්ජාලයට මුදාහැරි කෙටි කාලය තුළ විශාල ප්‍රතිචාර තිබෙනවා. හරියාකාරව සැලසුම් කළ නිසයි මේ ගීතය හොඳ මට්ටමක පවතින්නෙ. මගේ අම්මා තමයි මගේ මුල්ම රසිකාවිය. තාත්තා, අයියා, අක්කා සහ මගේ මිතුරන් වගේම යශාන් අයියාත් මේ ගමනේදී සිහිපත් කළ යුතුයි.

මේ පිළිබඳව නිෂ්පාදක යශාන් ද සිල්වා මෙලෙස අදහස් දැක්වීය.

"මම හඳුන්වාදෙන පළමු වැනියා ආලෝක් නෙවෙයි. අලුතෙන්ම හඳුන්වා දෙන කෙනා තමයි ආලෝක්. ආලෝක් මට හමුවෙන්නෙ මීට මාස තුනකට පමණ කලින්. කාර්යබහුල කාලෙක. ඔහුගේ තිබුණු උනන්දුව හා කැපවීමත් සමග මා සතු සාර්ථක වීමේ ඉව නිසාම ඔහුගේ දක්ෂතාවත් එක්ක බොහෝ දුර යන්න හැකිවුණා. මුලදී ඔහු cover song කියමින් තමයි හිටියෙ. මේ කටයුත්ත සංගීතවත් කරන්න බාරදෙන්න හිටිය හොඳම කෙනා තමයි සංජුල හිමාල්. ඔහුත් සමග එකතු වෙලා තමයි තනුව නිර්මාණය කළේ. මෙහි ගීත දෙකක තනු දෙකක් එක් නිර්මාණයට ගොනුකළා. වචන ගැන කල්පනා කරමින් සිටියදී තමයි යූ ප්‍රගීත් රාජපක්ෂව හමුවෙන්නෙ. ඔහුගේ වචන දින දෙක තුනකින් හමුවුණාට පසුව අපි පටිගත කිරීම් සිදුකළා. පැය තුනක් ඇතුළත පටිගත කිරීම් කිරීම අවසන් කිරීමෙන්ම ආලෝක් ගැන තිබුණු විශ්වාසය වැඩිවුණා.

නිෂ්පාදනය හා අධ්‍යක්ෂණය හා ගීතයක් නිර්මාණය කිරීම ගැන කියනවා නම් එහි අපැහැදිලි තැන් බොහොමයක් තිබෙනවා. අධ්‍යක්ෂණය කියන්නෙ තනුව නිර්මාණය කිරීම සහ පටිගත කිරීම. නිෂ්පාදනය කියන්නෙ ඒ අධ්‍යක්ෂණය මෙහෙයවීම. එය කොයිවිදියටද?, එළිදක්වන්නෙ කවද්ද? ආදී හැම දෙයක්ම සිදුවෙන්නෙ නිෂ්පාදකගෙ අතින්. එය තමයි මගේ වගකීම. ගීතයක් නිර්මාණය කරනවා කියන්නෙ ගීතයක් නිර්මාණය කරලා සීඩී පටය නිර්මාණකරුගේ අතට දීම. එය නෙවෙයි මම කරන්නෙ. ඒ ගීතය තුළින් ඒ කෙනාව කලාකරුවෙක් විදියට නිර්මාණය කිරීම. ඔහු අඳින කතාකරන, රූපවාහිනියට මුහුණදෙන ආකාරය සමාජයත් එක්ක ගැටෙන ආකාරය ආදී සියලු දේ කියාදෙමින් කලාකරුවෙකු ලෙසින් නිර්මාණය කිරීම තමයි නිෂ්පාදකවරයෙකුගේ කාර්යය. මගේ පැත්තෙන් හදවතින් සහ උපරිමෙන්ම ඒ කටයුත්ත සිදුකරනවා. ආලෝක් කියන්නෙ එවැනි කුසලතා පිරිපුන් නිර්මාණකරුවෙක්.

0777-128606

සටහන - ඉඳුනිල් සින්දු