(සුජිත් හේවාජුලිගේ සහ  අංජුල මහික වීරරත්න)

ඉන්ධන, ගෑස් සහ විදුලිය ප්‍රශ්නය සම්බන්ධයෙන් පාර්ලිමේන්තු කටයුතු පිළිබඳ කාරක සභා රැස්වීමේදී  අද (28) පුළුල්ව  සාකච්ඡා කෙරිණ.

පාර්ලිමේන්තු කටයුතු පිළිබඳ කාරක සභාව කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී අද (28) පෙරවරුවේ රැස්විය.

මේ සාකච්ඡාවට විදුලිබල හා බලශක්ති අමාත්‍ය කාංචන විජේසේකර සහ වෙළෙඳ හා සමෘද්ධි සංවර්ධන අමාත්‍ය  ශෙහාන් සේමසිංහ යන මහත්වරුද එම අමාත්‍යාංශවල නිලධාරීහුද කැඳවනු ලැබ සිටියහ.

ඉන්ධන ගෑස් සහ විදුලිය පිළිබඳ ගැටළු විසඳීම සඳහා   පක්ෂ නායකයන් ඇතුළු කාරක සභා සාමාජිකයෝ මෙහිදී අදාළ අමාත්‍යවරුන්  සහ නිලධාරීන් සමග දීර්ඝ වශයෙන්  සාකච්ඡා කළහ.

ඉන්දියන් ඔයිල් සමාගම සහ ඛනිජ තෙල් නීතිගත සංස්ථාවට ඒකාබද්ධ මිල සූත්‍රයක් හදුන්වා දීමට  සාකච්ඡා  පැවැත්වෙන බව   විදුලි බල සහ  බලශක්ති අමාත්‍ය කංචන විජේසේකර මහතා මෙහිදී  පැවසීය.

මෙම අමාත්‍යාංශ දෙක සදහා නව ලේකම්වරුන්  දෙදෙනකු පත්කර ඇති බවත්  අර්බුදය ජය ගැනීමට නිලධාරීන් සමග හැකි උපරිමයෙන් කටයුතු කරන බවත් අමාත්‍යවරයා  ප්‍රකාශ කළේය.

එසේම මෙම අර්බුදය සදහා බලපා ඇති හේතූ සහ  කළමණාකරණ දුර්වලතා පිළිබද සවිස්තරාත්මක වාර්තාවක් පාර්ලිමේන්තුවට ලබා දෙන බව සඳහන් කළ අමාත්‍යවරයා ඛනිජතෙල් සැපයුම අඛණ්ඩව සිදු කිරීම සදහා මුතුරාජවෙල පර්යන්තයේ  නිලධාරීන්  පැය විසිහතර පුරා  සේවය කරන බවත්  ඔහු පැවසුවේය.

විදුලි බල ජනනය සදහා අවශ්‍ය ගල් අගුරු නැවක් සදහා අද (28) ගෙවීම් කළ බවත්  ලබන සැප්තැම්බර් දක්වා අවශ්‍ය ගල් අගුරු රටේ පවතින බවත් කාංචන විජේසේකර මහතා  පැවසීය.

විදුලි බල ජනනය සදහා අවශ්‍ය ඉන්ධනවලට ප්‍රමුඛත්වයක් ලබා දෙන බව මෙහි දී පැවසූ අමාත්‍යවරයා ගුවන් සේවා සහ විදුලි බල මණ්ඩලයට ඍජුවම ඉන්ධන මිලදී ගැනීම  සදහා අවශ්‍ය පනත් සංශෝධනය කිරීමට ඉදිරි කාලයේදී කටයුතු කරන බවත් හෙතෙම සඳහන් කළේය.

ඒ සදහා පක්ෂ නායකයන් ඇතුළු පක්ෂ විපක්ෂ සියලු දෙනාගේම සහය අපේක්ෂා කරන බව අමාත්‍යවරයා  වැඩිදුරටත් පැවසීය.

පුනර්ජනනීය බලශක්තිය මෙරට විදුලි බල පද්ධතියට  යොදා ගැනීමට එරෙහිව පවතින බාධක පිළිබදවද කාරක සභා මන්ත්‍රීවරුන්ගේ විශේෂ අවධානය යොමුවිය.

මේ අනුව සර්ව පාක්ෂික කමිටුවක් ස්ථාපනය  කර  පුනර්ජනනීය බලශක්ති ප්‍රභවයන් පුළුල් කළ යුතු බව කාරක සභා සාමාජිකයෝ පෙන්වා දුන්හ. 

ඒ සදහා අවශ්‍ය පනත් සංශෝධනය කිරීමට ඉදිරි කාලයේදී  අපේක්ෂා කරන බවත් එම සංශෝධන හරහා පුනර්ජනනීය බලශක්තිය මෙරට විදුලි බල පද්ධතියට වැඩිවශයෙන් එක් කර ගැනීමට හැකිවනු ඇති බවත් විදුලි බල මණ්ඩලයේ සභාපතිවරයා මෙහිදී පැවසීය.

ගෑස් හිගය සම්බන්ධයෙන් වෙළෙද සහ සමෘද්ධි සංවර්ධන අමාත්‍ය  ශෙහාන් සේමසිංහ මහතා මෙහිදී අදහස් දැක්වීය.

ඉන්දීය සහ ලෝක බැංකු ණය පහසුකම් යටතේ ගෑස් සැපයුම සාමාන්‍ය තත්වයට ගෙන ඒමට හැකිවනු ඇතැයි  ඔහු වැඩිදුරටත් පැවසීය.