කටුනායක හදන සිමෙන්ති කර්මාන්ත ශාලාවට ලොකු විරෝධයක්

(ටී.කේ.ජී.කපිල )

කටුනායක  18 කණුව මංසන්ධිය අසළ , තරු පංතියේ සංචාරක හෝටලයක් ඉදි කරන මුවාවෙන් ඉදිකරන සිමෙන්ති නිෂ්පාදන සහ ඇසුරුම් කර්මාන්තශාලාවක්ට එරෙහිව ප්‍රදේශවාසීන්  අද  උදෑසන දැවැන්ත විරෝධතාවක් සිදු කරති.

ඉකුත් 2020.12.10 දින මධ්‍යම පරිසර අධිකාරිය විසින් මේ සදහා වූ ගොඩනැගිලි සැළසුම තරු පංතියේ සංචාරක හෝටලයක් සදහා අනුමත කර ඇති අතර , 2025.12.25 දින නාගරික සංවර්ධන අධිකාරිය විසින් ද සංවර්ධන බලපත්‍රයක් නිකුත් කර තිබේ .

එහිදී අක්කර 06 රූඩ් 01 ක වපසරියකින් යුතු මෙම ඉඩමේ වර්ග මීටර් 3,857 ක තනි මහල් ගොඩනැගිල්ලක් සදහා මුලින් අනුමැතිය ගෙන පසුව එය වර්ග මීටර් 12,925 ක වපසරියකින් යුතු පස් මහල් සිමෙන්ති නිෂ්පාදන කර්මාන්තශාලා ගොඩනැගිලක් සදහා බලපත්‍රයක් දක්වා වෙනස් කර ලබා ගෙන තිබේ .

මෙම ඉදි කිරීම කොළඹ - කටුනායක ප්‍රධාන මහා මාර්ගයේ සිට කළපුව දක්වා විහිදෙන අතර , එමගින් කොළඹ - කටුනායක අධිවේගී මාර්ගය , කටුනායක ගුවන් තොටුපොළ , ප්‍රදේශයේ පිහිටි සංචාරක හෝටල් සමූහය , ප්‍රසිද්ධ ජාත්‍යාන්තර පාසල් 03 ක් , මීගමුව කළපුව සහ එහි රැකියාවෙහි නිරත ධීවර ජනතාව , අතිවිශේෂ ගැසට් පත්‍රයකින් ප්‍රකාශයට පත් කර ඇති ලියනගෙමුල්ලේ කඩොලාන සංරක්ෂිත වනාන්තරය , කටුනායක නිදහස් වෙළෙඳ කළාපයේ සේවයේ නිරත සේවිකාවන්ගේ නේවාසිකාගාර මෙන්ම මුතුරාජවෙල සංචාරක බෝට්ටු ව්‍යාපාරයේ නිරත වූවන් ඍජුවම බලපෑමකට ලක් වේ

අතිශය සංවේදී ජනාවාස සහිත ව්‍යාපාරික සහ සංචාරක කර්මාන්තයෙහි ප්‍රවර්ධනයක් සහිත මෙම ප්‍රදේශයේ , සිමෙන්ති දූවිලි ( Cement Dust ) වලින් පිරුණු පරිසර පද්ධතියක් නිර්මාණය වීම , බලවත් ගැටළු මතු කරන බව මෙම විරෝධතාවයට සහභාගී වූ ප්‍රදේශවාසීහු පෙන්වා දුන්හ .