වෘත්­තිය මට්ටමේ දක්ෂ නර්තන ශිල්පිනියක වන අයේෂා මධුෂාණි සමගින් මෙවර 'සාරවිට' තරු කතාබහ අරඹන්නට අපි සූදානම් වුණෙමු. නර්තන ශිල්පිනියක මෙන්ම නිරූපිකාවක ලෙසද කටයුතු කරන අයේෂා, මේ වනවිට 'ස්කුබා' රූපරාජිනි තරගයටද එක්ව සිටින්නීය. මේ ඇය සිය ඉදිරි කලා කටයුතු පිළිබඳව අපිට පැවසූ අයුරු.

අයේෂා කියන්නේ නර්තන ශිල්පිනියක්ද නැත්නම් නිරූපිකාවක්ද?

ක්ෂේත්‍රයට ආවේ නම් නර්තන ශිල්පිනියක් විදිහට. ඒ 2010 අවුරුද්දේ. ඊට පස්සෙ 2011 අවුරුද්දේ මම රොසෑන් ඩයස් මහත්මිය යටතේ නිරූපණ ශිල්පය හැදෑරූවා. ඒ හරහා තමයි නිරූපණයට යොමු වුණේ. නමුත්, මම දැනටත් වැඩි දායකත්වයක් ලබා දෙන්නේ මගේ වෘත්තිය වන නර්තනයට.

ඒ කියන්නේ ඔබ නර්තනය පැත්තෙන් ලොකු දුරක් ආපු කෙනෙක්?

ඔව්. දැනට මම අවුරුදු 06ක් තිස්සේ නර්තනයේ යෙදෙනවා. දැනට මට මගේම කියලා නර්තන කණ්ඩායමක් තියෙනවා. ඒක පටන් ගත්තේ 2012 අවුරුද්දේ. ඊට අමතරව මම 2014 අවුරුද්දේ සිරස රූපවාහිනි නාළිකාව විසින් සංවිධානය කළ 'ඩාන්සින් ස්ටාර්' තරගයට ඉදිරිපත් වුණා. එහිදී අවසන් 10 දෙනා අතරට පිවිසෙන්නට මට හැකි වුණා.

දක්ෂ නර්තන ශිල්පිනියක් වෙලත් අයේෂා නිරූපිකාවක් වෙන්න කැමති වුණේ ඇයි?

පුංචි කාලේ ඉඳලා මම හැම දෙයක්ම අත්හදා බලන්න කැමතියි. නිරූපණ ශිල්පයට පමණක් නොවෙයි මම පුංචි කාලේ රංගනයටත් කැමතියි. අවුරුදු 5ක් වෙද්දී මම චිත්‍රපට හා ටෙලිනාට්‍ය සුළු චරිතවලටත් දායක වෙලා තියෙනවා. ඊට අමතරව මම පාසල් යන කාලේ ක්‍රීඩාවටත් සම්බන්ධ වෙලා හිටියා. බොහෝ දෙනෙක් හිතුවේ මම ඒ පැත්තෙන් ඉදිරියට යයි කියලා. පස්සෙ මම නර්තනය පැත්තට යොමු වුණා. ඉතින් මගේ තියෙන ඔය විවිධ අත්හදා බැලීම මත තමයි නිරූපණය පැත්තටත් යොමු වෙන්න මම හිතුවේ.

නිරූපිකාවක් හා නර්තන ශිල්පිනියක් විදිහට මේ ක්ෂේත්‍ර තුළ අද ඔබ නමක් හදාගෙන තියෙනවාද?

ඔව්. බොහෝ දෙනෙක් මාව හඳුනනවා. නමුත්, නමක් හදාගෙන තියෙනවාද නැද්ද කියලා දන්නෙ නැහැ. හැමෝටම එහෙම එක පාරටම නමක් හදාගන්න බැහැ. ඒකට කාලයක් යනවා. මේ ක්ෂේත්‍රය තුළ මම හෙමින් ගමනක් යන්නෙ උත්සාහ කරන කෙනෙක්. ඉතින් මගේ නමත් මේ හෙමින් යන ගමන තුළ හදාගන්න උත්සාහ කරනවා.

නිරූපිකාවක්, නර්තන ශිල්පිනියක් නොවුණා නම් ඔබ?

අනිවාර්යයෙන්ම ගුරුවරියක් නැත්නම් නීතිඥවරියක් වෙනවා.

දැනට දායක වෙලා තියෙන කලා නිර්මාණ?

දැනට මම මියුසික් වීඩියෝ 03කට විතර පෙනී ඉඳලා තියෙනවා. ඊට අමතරව 'කුස පබා', 'කොස්තපල් පුඤ්ඤසෝම' ඉදිරියට එන්න තියෙන 'මායා' කියන චිත්‍රපටවලට නර්තනයෙන් දායක වෙලා තියෙනවා.

රංගනය පැත්තට යොමු වෙන්නේ අදහසක් නැද්ද?

තියෙනවා. දැනට රංගනය පැත්තට යොමු වෙන්න ආරාධනා පවා ලැබිලා තියෙනවා. අර්ජුන් කමල්නාත් අයියා ඉදිරියේදී නිර්මාණය කරන්නට සැලසුම් කරලා තියෙනව ටෙලිනාට්‍යයකට දායක වෙන්න අවස්ථාව ලැබිලා තියෙනවා.

මේ දිනවල ඔබ රූපරාජිනි තරගයකට සම්බන්ධ වෙලා ඉන්නවා නේද?

ඔව් 'ස්කුබා' රූපරාජිනි තරගයට සම්බන්ධ වෙලා ඉන්නවා. එහි අවසන් තරගකාරියන් අතර තරගවලට මේ දවස්වල සහභාගී වෙනවා. අදහස තියෙන්නෙ මේ තරගයේ ජයග්‍රාහිකාව වෙන්න තමයි.

බුද්ධික සේනාධීර