‘සිංහල දෙමළ ජනතාව අතර සංස්කෘතික බැඳීම් ශක්තිමත් කරන සංහිඳියාව ගොඩනගන සිංහල අලූත් අවුරුද්ද උදාවත් සමග කොහාගේ හඬ පරදවා උතුරෙන් ෆෙඩරල් හඬ මතුවුණා. ෆෙඩරල් කියන්නේ රට බෙදනවා කියන එකයි. රටෙන් කොටසක් ඉල්ලා පැවති ත‍්‍රස්තවාදය යුධමය වශයෙන් හා මතවාදිමය වශයෙන් පරාජය කර වසර හතක් ඉක්ම ගොස් තිබියදී නැවතත් මේ මතවාදය මතුව ඒම ගැටළුවක්‘ යැයි ජාතික හෙළ උරුමයේ නිශාන්ත ශ්‍රී වර්ණසිංහ මහතා අද (20) පැවැති මාධ්‍ය හමුවකදී පැවසීය.

‘ෆෙඩරල් ක‍්‍රමයක් හැමදාමත් ඉල්ලා සිටින්නේ දෙමළ ජාතිවාදී දේශපාලන නායකයොයි. නිදහසින් පසුව වගේම නිදහසට පෙරත් ජී. ජී. පොන්නම්බලම්, අමිර්තලිංගම්, චෙල්වනායගම් වැනි නායකයින් ෆෙඩරල් පාලනයක් ඇති කිරිමට උත්සාහ කළා. මේ දෙමළ නායකයින් තමයි දෙමළ ජනතාව අතර වෙනම රාජ්‍යයක් පිළිබඳ අදහස් වැපිරුවේ. ඔවුන් කියපු දේ ලබාදෙන්න බැරිවුණ නිසා තමයි දෙමළ තරුණ තරුණියන් ආයුධ අතට ගත්තේ. නමුත් එයින් ඇතිවුණ ප‍්‍රතිඵලය කුමක්ද? වසර තිහක යුද්ධයකින් පසුව දෙමළ ජනතාවට ඉතිරිවුණේ අමුසොහොනක් පමණයි.‘ යැයි කී වර්ණසිංහ මහතා ආර්. සම්බන්ධන් ඇතුළු දෙමළ සන්ධානය පෙනී සිටියේ කොටි සංවිධානයේ අවශ්‍යතාවය අනුව බවත් ඔවුන් පාර්ලිමේන්තුවේ කතා කළේ කොටි ඉල්ලීම් බවත් දැන් ඒ අයට නිදහස ප‍්‍රජාතන්ත‍්‍රවාදය ලැබී තිබෙන නමුත් නැවත මේ කොහාටද රට ගෙන යන්න හදන්නේ යැයි විමසන බවත් කීවේය.

nisha_2016420