(සුමිත් පොතුපිටිය) 

කළුතර මාතෘ සහ ළමා රෝහලේ ගිනි ආරක්ෂක සංඥා පද්ධතිය අද (13)  රාත්‍රි ක්‍රියාත්මක වීමෙන් රෝහල් කාර්ය මණ්ඩලය සහ රෝගීන් ගිනි බියකින් කලබලයට පත්ව ඇති බව රෝහල් ආරංචි මාර්ග සඳහන් කරයි.

ගිනි ආරක්ෂක සංඥා නාදවීමත් සමගින් කළුතර මහ නගර සභාවේ ගිනි නිවේමේ ඒකකය දැනුවත් කර,  ආරක්ෂක අංශ සහ රෝහල් කාර්ය මණ්ඩලය එක්ව නේවාසික රෝගීන් පිරිසක් රෝහල් ගොඩනැගිල්ලෙන් ඉවත් කිරීමට කටයුතු කර තිබේ.

ගිනි නිවන භඨයින් ක්ෂණිකව   ළඟාවී පැයකට ආසන්න කාලයක් රෝහලේ විදුලි පද්ධතිය සහ රෝහල නිරීක්ෂණය කර , ආරක්ෂිත භාවය තහවුරු කරගැනීමෙන් පසු නේවාසික  රෝගීන් සහ රෝහල් කාර්ය මණ්ඩලය නැවත රෝහල් තුළට යොමු කර තිබේ.

දෙවන මහලේ ස්ථාපිත ව්දුලි සංඥා දැනුම් දීමේ ස්විචයක් කිසියම් පුද්ගලයෙකු විසින් ක්‍රියාත්මක කර ඇති බවත්, ඉන්පසු ගොඩනැගිල්ලේම ගිනි සංඥා එලාම් ක්‍රියාත්මක වී ඇති බවත් සඳහන්වේ.