වේගය, භීතිය, ත්‍රාසය සහ තරගකාරිත්වය එකට මුසු කරමින් ශ්‍රී ලාංකේය මෝටර් රථ ක්‍රීඩා ලෝකයට නව අත්දැකීමක් ලෙස කාල්ටන් මෝටර් රථ ක්‍රීඩා සමාජයේ සංවිධායකත්වයෙන් හා ආසියා මෝටර් රථ ක්‍රීඩා සමාජයේ මෙහෙයවීමෙන් පවත්වන ‘කොළඹ රාත්‍රී මෝටර් රථ හා යතුරු පැදි තරඟාවලිය‘ ලබන 15 වැනිදා කොළඹ ගාලු මුවදොර හා කොළඹ කොටුව ආශ්‍රිත ප්‍රධාන මාර්ගවලදී පැවැත්වේ. ඒ වෙනුවෙන් ධාවන පථ සූදානම් කිරීම මේ දිනවල ලහි ලහියේ සිදු කැරේ. පාර දෙපස නරඹන්නන්ගේ ආරක්ෂාව පිණිස වැලි කොට්ට හා ටයර් වළලු ද ඇතිරෙයි. ගාලු මුවදොර පිටිය හා කොටුව යෝර්ක් වීදිය ආශ්‍රිත සියලු ප්‍රධාන මාර්ග රේසින් ධාවන පථ මෙන් දිස් වේ. මෙම තරඟාවලියට මෙරට යතුරුපැදි හා මෝටර් රථ තරඟකරුවන් 150 දෙනෙකු ද, ජපානය, මැලේසියාව, හොංකොං, එංගලන්තය හා ඉන්දියාව යන රටවල් නියෝජනය කරමින් තරඟකරුවන් 35 දෙනෙකු ද තරඟ වැදීමට නියමිතය.