යොවුන් නිළි පබසරා මධුෂානි මේ දිනවල පුංචි තිරයේ නිතර දක්නට ලැබෙන චරිතයකි. දැනට විකාශය වන ටෙලිනාට්‍ය කිහිපයකින්ම අප හමුවට එන ඇය මේ දිනවල කලා කටයුතුවලින් තරමක් කාර්යබහුලව ඇත. රංගන ශිල්පිනියක ලෙස මෙන්ම නිවේදිකාවක ලෙසද කටයුතු කරන ඇයගේ කලා කටයුතු පිළිබඳ කතාබහ කිරීමට "අද" සමග එක්කාසු වූ මොහොතකි මේ.

කලා කටයුතු සමග ගෙවෙන ජීවිතය ගැන කිව්වොත්?

මේ දවස්වල ටෙලිනාට්‍ය කීපයක් සඳහා දායකත්වය ලබාදීලා තියෙනවා. ඊට අමතරව "සුරදූතියෝ", "දේදුන්නෙන් එහා" සහ "අංගනා" කියන ටෙලිනාට්‍ය මේ දිනවල විකාශය වෙනවා. තව ටෙලිනාට්‍ය කිහිපයක වැඩ කරගෙන යනවා.

පබසරා පුංචි තිරයට පමණක් සීමාවුණු කෙනෙක්ද?

එහෙම නැහැ. වේදිකා නාට්‍ය සඳහාත් මම දායක වෙලා තියෙනවා. මොකද වේදිකා නාට්‍යවලින් තමයි මම ටෙලිනාට්‍යවලට ආවේ. ටෙනිසන් කුරේ මහත්මයාගේ වේදිකා නාට්‍යවල ප්‍රධාන චරිතය සඳහා දායක වුණා කාලයක්. ඊට පස්සේ තමයි ටෙලිනාට්‍ය සඳහා අවස්ථාව ලැබුණේ. ඊට අමතරව නිවේදිකාවක ලෙසත් දැනට කටයුතු කරගෙන යනවා.

වේදිකාවෙන් රංගන ක්ෂේත්‍රයට එන පිරිසෙහි අඩුකමක් තියෙනවා නේද?

එහෙම කියන්නත් බැහැ. අද ඉන්න නවකයන් ගොඩක් දක්ෂතා තියෙන අය. අපිත් එක්ක එහෙම ගොඩක් අය වැඩ කරලා තියෙනවා. වේදිකාවෙන් රංගනයට ආවද, නැත්නම් නිරූපණයෙන් රංගනයට ආවද එහෙමත් නැත්නම් නිවේදනයෙන් ආවද කියන කාරණය අදාළ වෙන්නේ නැහැ. මොකද දක්ෂතාව තියෙනවා නම්‍, ඒ වැඩේ හරියට කරනවා නම් ඒ කෙනා මේ මොන ක්ෂේත්‍රයෙන් හරි රංගනයට එනවා.

නවක පරපුර අභියෝගයක්ද?

නැහැ. නවකයන් අභියෝගයක් නෙමෙයි. ඕනෑම කෙනෙක් තමන්ට ලැබෙන චරිතයට අභියෝගයක් වෙනවා. නැතුව තව කෙනෙක් එක්ක අභියෝගයක් වෙලා වැඩක් නැහැ. තමන් අභියෝගයක් හදාගන්න ඕනේ තමන්ට ගැටෙන්න තියෙන චරිතයක් එක්කයි.

ලංකාව තුළ උචිත ටෙලිනාට්‍ය සංස්කෘතියක් ගොඩනැගිලා තියෙනවාද?

එහෙම හිතනවා. මෙගා ටෙලිනාට්‍ය ගත්තත් ඒ සඳහා වරදක් කියන්න බැහැ. මොකද මමත් මෙගා ටෙලිනාට්‍ය සඳහා දායකත්වය ලබාදීලා තිබෙනවා. මෙගා ටෙලිනාට්‍යවලත් හොඳ නිර්මාණ තියෙනවා. මෑතකදී මම දායක වූ "අංගනා" කියන ටෙලිනාට්‍ය කොටස් 100ක ටෙලිනාට්‍යයක්. ඒකට ඉහළම ප්‍රතිචාර ලැබුණා. තාමත් ඒ සඳහා ප්‍රතිචාර ලැබෙනවා. ඒ නිසා මෙගා නාට්‍යද, කොටස් ටෙලිනාට්‍ය ද කියලා නැහැ. හොඳ කතා පිටපතක් තියෙනවා නම් මෙගාද කොටස්ද කියලා බේදයක් නැහැ. රසිකයන් ඒ දේ වැලඳ ගන්නවා.

නවකයන් බොහෝදෙනෙක් කරන චෝදනාවක් තමයි ප්‍රවීණයන්ගෙන් අත්වැලක් ලැබෙන්නේ නැහැ කියලා?

එහෙම කියන්න බැහැ. ගොඩක් ප්‍රවීණ අයගෙන් අතහිත ලැබෙනවා. ප්‍රවීණයන්ගෙන් ලොකු සහයෝගයක් හම්බවෙනවා. ඒ කතාව නම් සම්පූර්ණ වැරදියි. ඔවුන් අපිත් එක්ක කතා කරනවා. අපිට වැරදි අඩුපාඩු කියලා දෙනවා. ආඩම්බරකමක් නැහැ. නිහතමානියි. මම නම් අනිවාර්යෙන්ම ප්‍රවීණයන්ට ගරු කරනවා.

අතීතයේ රංගන ශිල්පියෙකුට හෝ ශිල්පිනියකට සමාජය විසින් යම් කිසි ගරුත්වයක් ලබාදුන්නා. නමුත් අද වනවිට එය ගිලිහෙමින් පවතිනවා නේද?

මෙහෙමයි, තාම ඒ තැන තියෙනවා. ඒ වුණාට අපේ මිනිස්සු බොරු කටකතා හදාගෙන ලංකාවෙ කලාකරුවන්ට ගොඩක් වෙලාවට වෙබ් අඩවි ඔස්සේ අපහාස කරනවා. මොකද රංගන ක්ෂේත්‍රයට දිහානේ මිනිස්සු ගොඩක් වෙලාවට බලන්නේ. ඉතිං මම කියන්නේ අනිත් ක්ෂේත්‍රවලත් ජනප්‍රිය අය ඉන්නවානේ. ඒවලත් හොඳ මිනිස්සු වගේම නරක මිනිස්සුත් ඉන්නවා. ඒ වුණාට කොයි වෙලෙත් චෝදනා නගන්නේ රංගන ක්ෂේත්‍රයේ පැත්තටයි. රංගන ක්ෂේත්‍රයෙත් හොඳ උගත්, වැදගත් ඉහළ තැන්වල රැකියා කරන කලාකරුවෝ ඉන්නවා. එක එක්කෙනා දකින විදිහත් එක්ක තමයි ඒ දේ තීරණය වෙන්නේ. ගොඩක් දෙනෙක් බලන් ඉන්නේ රංගන ශිල්පිනියකට මඩ ගහන්න.

සිනමාවට එන්න කැමැත්තක් නැද්ද?

සිනමාවට එන්න කැමැත්තක් තියෙනවා. මම චිත්‍රපටයක් කරා. නමුත් තාම ඒක පෙන්නුවේ නැහැ. ඒකත් එක්ක තමයි බලන්න ඕනේ සිනමාවේ මට ලැබෙන ප්‍රතිචාර කොහොමද කියලා. ඒක නිසා තාම කියන්න බැහැ සිනමාවට මාව ගැලපෙනවාද කියලා මම දන්නේ නැහැ.

රංගනයෙන් දායක වූ චිත්‍රපටයේ අත්දැකීම ගැන කිව්වොත්?

චිත්‍රපටය කළේ ඩොනල් අයි ප්‍රනාන්දු මහත්මයා. ඒකෙ ප්‍රධාන චරිත සඳහා අනර්කලී, මේනකා රංගනයෙන් දායක වුණා. තරුණ පරපුරේ කට්ටියක් එක්ක තමයි වැඩකරන්න හම්බුණේ. ටෙලිනාට්‍යවලට වඩා ගොඩක් වෙනස්. ඒකෙ අත්දැකීමෙන් රංගන ජීවිතයට ගොඩක් දේවල් එකතු කර ගන්න පුළුවන් වුණා.

ඉදිරියේ වැඩකටයුතු ගැන කිව්වොත්?

දිගටම රංගන ශිල්පිනියක් විදිහට වැඩකටයුතු කරගෙන යනවා. ඊට අමතරව මගේ නිවේදන කටයුතුත් මම මගඅරින්නේ නැහැ. නිවේදිකාවක් කියන දේටත් මම කැමති නිසා රංගන ශිල්පිනියක් කියනදේත් සමබරව යනවා.

මෙතරම් දුර එන්න අතහිත දුන්න පිරිසක් ඇතිනේ?

විශේෂයෙන් මම මතක් කරන්න ඕනේ නාලන් මෙන්ඩිස් මහත්මයාව. මොකද "අංගනා" ටෙලිනාට්‍යයෙන් තමයි පබසරා කියන නම ගොඩක් හැදුනේ. ඊට අමතරව නම් වශයෙන් කියන්න ගියොත් ගොඩාක් අය ඉන්නවා මට උදව් කරපු. විශේෂයෙන් මතක් කරන්න ඕනේ ටෙනිසන් කුරේ මහත්මයාව. එතුමාගේ වේදිකා නාට්‍යවලින් තමයි මම ආවේ. දැනට මම වැඩ කරන සිව ගුරුනාදන් ඇතුළු සියලුම අධ්‍යක්ෂකවරුන් මතක් කරනවා.

ඩිලාන් ක්‍රිෂාන්ත/ ඡායාරූප - කවීත් මිලින්ද